Հրդեհ է բռնկվել աշխարհի ամենաբարձր բնակելի շենքերից մեկում

Դուբայում (Արաբական Միացյալ Էմիրություններ) օգոստոսի լույս 4-ի գիշերը Torch Tower աշխարհի ամենաբարձր բնակելի երկնաքերներից մեկում բռնկված հրդեհը մարվել է: Այս մասին հայտնել է Էմիրության քաղաքացիական պաշտպանության վարչության ներկայացուցիչը, տեղեկացնում է «Արմենպրես»-ը: «Դուբայի քաղաքացիական պաշտպանության վարչության տնօրեն գեներալ Ռաշեդ Թանի ալ Մաթրուշին հայտարարել է, որ միջադեպը հարթված է»,- տեղեկացրել են գերատեսչության մամուլի ծառայությունում: 337 մետր բարձրությամբ 79-հարկանի կառույցում հրդեհը մարվել Է ժամը մոտավորապես 04:00-ին (Երեւանի ժամանակով 04:00-ին): Իշխանությունների տվյալներով՝ երկնաքերում գտնվող մարդիկ տարահանվել են, տուժածներ չկան: Հրդեհից տուժածներին օթեւան կտրամադրեն Princess Tower երկնաքերում: Torch Tower-ում ավելի վաղ հրդեհ էր բռնկվել 2015 թվականի փետրվարին. այն ժամանակ հարյուրավոր մարդիկ Էին տարհանվել, տուժել էր մի քանի տասնյակ մարդ: