Հօգուտ Սուքիասյանների որոշում է կայացվել

«Հրապարակ» օրաթերթը գրում է․ 2020 թվականին «Բջնի» ՓԲԸ նախկին սեփականատեր, Ազգային ժողովի իշխող խմբակցության պատգամավոր Խաչատուր Սուքիասյանի ընտանիքը դիմել էր դատարան՝ պետությունից մոտ 3.5 միլիարդ դրամ գումարի պահանջով՝ որպես ժամանակին սխալ հաշվարկված հարկային պարտավորությունների համար փոխհատուցում: Այժմ այս գործով նոր զարգացումներ կան։ Մենք տեղեկացանք, որ Հայաստանի վարչական դատարանի դատավոր Միքայել Մելքումյանը հօգուտ Սուքիասյանների որոշում է կայացրել, ըստ որի՝ «Բջնիի» գործով վարչական վարույթը պետք է վերսկսվի։

Այս գործին քաջատեղյակ փաստաբան Նարեկ Ալոյանը, որը թեպետ գործով կողմի ներկայացուցիչը չէ, բայց «Հրապարակ»-ի հետ զրույցում ասաց, որ 2020թ. Ռոբերտ Սուքիասյանը՝ որպես շահագրգիռ անձ, դիմում է ներկայացրել Պետական եկամուտների կոմիտե՝ խնդրելով վերսկսել 2008թ. անցկացված վարչական վարույթը՝ նոր ապացույցի հիմքով․ «Նախկինում դրա վերաբերյալ բերվել էր բողոք, որը քննության չէր առնվել, իշխանափոխությունից հետո դիմում է ներկայացվել ՊԵԿ, որպեսզի վարույթի վերսկսումը սկսվի, ՊԵԿ-ը մերժել էր։ Այդ վարույթի վերսկսումը մերժելու որոշումը բողոքարկվել է վարչական դատարան, որն էլ բավարարվել է։ Այսինքն՝ ենթադրվում է, որ եթե վերջնական ակտ կայացվի, ՊԵԿ-ում վարչական վարույթը պետք է վերսկսվի»։

Փաստաբանը նշեց, որ մյուս կողմը վերաքննիչ բողոք է պատրաստվում  ներկայացնել վարչական դատարանի որոշման դեմ։ Մենք փորձեցինք զրուցել նաեւ Խաչատուր Սուքիասյանի ներկայացուցիչ Տիգրան Խաչիկյանի հետ, սակայն նա հրաժարվեց որեւէ մեկնաբանություն տալ՝ նշելով, թե այս գործով մեկնաբանություն տալը  համաձայնեցված չէ իր վստահորդի հետ։

Հիշեցնենք, որ իշխանափոխությունից հետո Խաչատուր Սուքիասյանը, անդրադառնալով «Բջնի» գործարանին, նշել էր, որ  գործարանն անօրինական կերպով է խլվել իրենից եւ իրավական ճանապարհով պետք է վերադարձվի։ Իսկ ԱԺ նախկին պատգամավոր Ռուբեն Հայրապետյանը պատասխանել էր Սուքիասյանի հայտարարությանը․ «Խաչատուր Սուքիասյանը կարող է գիտունիկի տեսքով գեղեցիկ խոսել տեսախցիկների առջեւ, «Բջնին» մենք ձեռք ենք բերել 2010 թվականին։ Պետությունը վաճառել է, ես գնել եմ, եթե գտնում են՝ խլել եմ, թող իմ տված փողը հետ տան, ես տամ իրենց»։ Այս վարույթը եւ վարչական դատարանի որոշումն ուղղված են գործարանը վերադարձնելուն, չնայած նման հայցերն ունեն վաղեմության ժամկետ, եւ 2010 թվականին կայացված գործարքը չեղյալ անելու համար, հավանաբար, հարկավոր է, որ քրեական գործ եւս հարուցվի, ու գործարքը ճանաչվի անօրինական կամ ճնշման ներքո իրականացված։