Ով կփոխարինի Լեւոն Յոլյանին. Երկու անուն է շրջանառվում

«Հրապարակ» թերթը գրում է. «Սերժ Սարգսյանի ամենամտերիմ անձանցից մեկի՝ Հաշվեքննիչ պալատի նախագահ Լեւոն Յոլյանի անսպասելի հրաժարականը երեկ տարատեսակ մեկնաբանությունների առիթ տվեց։ Վերջինիս պաշտոնավարման ժամկետի ավարտին ընդամենը մեկ տարի էր մնացել։

Յոլյանը մեզ հետ զրույցում վստահեցրեց, որ անձնական պատճառներով է դիմում գրել։ Իշխանական շրջանակներից էլ ասում էին, որ Փաշինյանին հորդորով է հեռանում՝ տեղը զիջելով հեղափոխականի, որպեսզի մեծ թափով սկսեն համակարգային կոռուպցիայի բացահայտումը։ Ինքը՝ Յոլյանը, մեզ հետ զրույցում հիշեցրեց, որ 14 տարի ոլորտում է, 2017-ից պալատի նախագահն է՝ հոգնել է, բացի այդ՝ անձնական պլաններ ունի, եւ իրեն շատ ժամանակ է հարկավոր դրանք իրագործելու համար։

Բիզնեսո՞վ եք զբաղվելու․ հարցին Յոլյանն ասաց, որ չի ցանկանում պատասխանել․ «Ինչ պիտի անեի, արել եմ, հետեւիցս թողնում եմ լուրջ պրոֆեսիոնալ թիմ՝ ունակ»։

Հաստա՞տ ճնշումներ չեն եղել։ «Միայն արյան ճնշում»,- կատակեց նա։ «Այս պահին գտնում եմ, որ իմ ընտանիքին ավելի շատ եմ պետք»։ Իսկ հնարավո՞ր է Ձեր ընկերը՝ Սերժ Սարգսյանն է խորհուրդ տվել դիմում գրել, ընդդիմությունը, ասում են, նոր թափով իշխանափոխության պայքար է սկսելու։ «Լավ, էլի։ Կրկնում եմ՝ հազար ուրիշ խնդիրներ ունեմ, որոնք ավելի կարեւոր են»։

Յոլյանին փոխարինողի երկու անուն է շրջանառվում՝ Ատոմ Ջանջուղազյանի եւ ՔՊ-ական նախկին պատգամավոր, պալատի անդամ Եղիշե Սողոմոնյանի։ Սակայն Յոլյանի հետ զրույցից հասկանալի դարձավ, որ առավել հավանական է վերջինի թեկնածությունը։ Նա ասաց, որ «երիտասարդ, թարմ» ուժ կգա»:

Առավել մանրամասն՝ թերթի այսօրվա համարում