Արա Մկրտչյանը հիվանդ է քովիդով եւ գտնվում է կալանավայրում, սա հակամարդկային է. Պետրոսյան

Վերաքննիչ դատարանը Քասախ համայնքի ղեկավար Արա Մկրտչյանին կալանավորելու որոշում կայացրեց: Հիշեցնենք, որ առաջին ատյանի դատարանը մերժել էր Արա Մկրտչյանին կալանավորելու միջնորդությունը, ինչը դատախազությունը բողոքարկել էր Վերաքննիչ դատարանում, որն էլ բավարարել է այն։ Նրա դեմ մեղադրանք է առաջադրվել` ՀՀ քրեական օրեսնգրքի 308-րդ հոդվածի 1-ին մասով, 308-րդ հոդվածի 2-րդ մասով (2 դրվագ), 314-րդ հոդվածի 1-ին մասով (3 դրվագ) եւ 315.2 հոդվածով։ Այս մասին «Իրավունքն» ուշագրավ մանրամասներ պարզեց «Իմ հզոր համայնք» կուսակցության կողմից Քասախ համայնքում ավագանու թեկնածու առաջադրված ՄԱՐԳԱՐԻՏԱ ՊԵՏՐՈՍՅԱՆԻՑ:

– Քասախ համայնքի ղեկավարը մեղադրվում է մի շարք չարաշահումներ կատարելու մեջ: Ի՞նչ կասեք այս մասին` որպես քասախցի:

– Սա ինչպես միշտ` վարչապետի աթոռը զբաղեցրած անձի շոուն է: Արա Մկրտչյանը մեր համայնքի սիրված ու հարգված ղեկավարն է` արդեն շուրջ 30 տարի: Նրա նկատմամբ այսպիսի վերաբերմունքը պայմանավորված է նրանով, որ 2018 թվականից սկսած երբեւէ չի թելել իշխանության թելը, չի դավաճանել իր ժողովրդին եւ չի գնացել կապիտուլիացիայի: Դրա համար էլ այսօր ենթարկվում է իշխանության կողմից հալածանքների ու քաղաքական հետապնդումների: Ի դեպ, Արա Մկրտչյանին կալանավորելու որոշումը կայացվել է ոչ նրա ներկայությամբ: Նրա փաստաբանը միջնորդություն էր ներկայացրել, որ Արա Մկրտչյանը վարակվել է կորոնավիրուսով եւ չի կարող նիստին ներկայանալ: Մինչդեռ ոչ մի հանգամանք հաշվի չառնելով` կայացրեցին կալանքի որոշում:

– Իսկ որեւէ տեղեկություն կա՞ նրա առողջական վիճակի մասին եւ որտե՞ղ է հիմա գտնվում:

– Այս պահին էլ Արա Մկրտչյանը հիվանդ է քովիդով եւ գտնվում է կալանավայրում: Չեն էլ թողնում, որ հիվանդանոց տեղափոխվի: Մինչդեռ նա ունի շաքարային դիաբետ: Փաստորեն, ստացվում է, որ մինչեւ մահացու ծանր վիճակում չլինի, չե՞ն տեղափոխելու հիվանդանոց: Սա հակամարդկային է: Կալանավորման որոշում են կայացրել այն հիմքով, որպեսզի նա չխանգարի քննությանը, բայց չունեն որեւէ ապացույց, որ նա կարող էր խանգարել: Մենք մեր համայնքապետին շատ սիրում ենք ու մտահոգ ենք նրա առողջական վիճակով:

– Ձեր գնահատմամբ` ինչո՞ւ հենց հիմա որոշեցին կալանավորել Արա Մկրտչյանին եւ որքանո՞վ այս որոշումը կապ կարող է ունենալ նրա դստեր` ԱԺ «Պատիվ ունեմ» խմբակցության պատգամավոր Աննա Մկրտչյանի օրենսդրական գործունեության հետ:

– Միանշանակ, սա անձնական վրեժխնդրություն է` կապված Արա Մկրտչյանի դստեր եւ կապիտուլյանտի միջեւ առկա կոնֆլիկտի: Միեւնույն ժամանակ, սա նաեւ կապված է նրա հետ, որ առաջիկայում Քասախում սպասվում են ՏԻՄ ընտրություններ: Արա Մկրտչյանին կալանավորելով` փորձում են քասախցիներին կոտրել: Նույն սցենարն է, ինչ Գորիսում, դրա համար էին կալանավորել Գորիսի համայնքապետ Առուշ Առուշանյանին: Բայց իշխանությանը պետք է հիասթափեցնեմ, որովհետեւ ինչպես Գորիսում, մենք ոչ միայն չենք կոտրվում, այլ ավելի ուժեղացել ենք ու մարտական ենք տրամադրված: Այնպես որ, «մենք գալիս ենք», ինչպես ասված է մեր կարգախոսում:

– Արա Մկրտչյանը պատրաստվո՞ւմ էր մասնակցել ՏԻՄ ընտրություններին` որպես համայնքապետի թեկնածու:

– Ոչ, չի առաջադրվել` զուտ այս քաղաքական հետապնդումների պատճառով: Հիմա համայնքում ունենք նոր կուսակցություն` «Իմ հզոր համայնք»-ը, որը փոխկապակցված չէ որեւէ այլ քաղաքական ուժի հետ եւ գործելու է ի շահ համայնքի: Այդպես եղել է նաեւ Արա Մկրտչյանի ղեկավարման տարիներին, մեր համայնքի մշակույթի տունը որեւէ ձեւով չի զիջում երեւանյան մշակութային տներին: Ավելին` Քասախը լավագույն համայնք է ճանաչվել` հենց Արա Մկրտչյանի շնորհիվ, որովհետեւ մի ընտանիքի պես է պահել բոլորիս: