Ամենի հետևում Թևոսյան Վահագնն է

Հրապարակը գրում է.  Հանրային հեռարձակողի խորհրդի նախկին անդամներ Լևոն Գալստյանի և Մերուժան Տեր- Գուլանյանի հրաժարականների հետևում, պարզվում է, կանգնած է խորհրդի անդամներից մյուսը՝ նախկին իմքայլական պատգամավոր Վահագն Թևոսյանը: Մեր տեղեկություններով, վերջինս շուտով կնշանակվի խորհրդի նախագահ՝ փոխարինելով Արա Շիրինյանին։ Մեզ ասացին նաև, որ Վահագն Թևոսյանը Տեր- Գուլանյանի ու Գալստյանի հետ անընդհատ տհաճ խոսակցություններ է հրահրել, քանի որ վերջիններս պահանջում էին Նիկոլ Փաշինյանի հրաժարականը, նույնիսկ ասել է՝ «դիմում գրեք, գնացեք»։ Մեզ հետ զրույցում Մերուժան Տեր- Գուլանյանը, պատասխանելով հարցին, թե ճի՞շտ է, որ շուտով Թևոսյանը կնշանակվի խորհրդի նախագահ, ասաց, որ կարող է ենթադրել: «Ես ենթադրում եմ, որ Վահագնին բերել են դրա համար, ուրիշ բան չեմ կարող ասել, խոսակցություն չի եղել, ես ենթադրում եմ, որովհետև Մավրն արեց իր գործը, Մավրը կարող է հեռանալ (նկատի ունի Արա Շիրինյանին` Կ․ Ս.)»,- ասաց Տեր- Գուլանյանը։ Հարցրինք՝ ճի՞շտ է, որ իրենց հրաժարականների համար մեծ «ներդրում» է ունեցել Վահագն Թևոսյանը: «Ճիշտն ասած՝ չգիտեմ՝ ունեցե՞լ է, թե՞ ոչ․․․, ունեցած կլինի, որովհետև, վերջին հաշվով, իմքայլականների և իմ ու Լևոն Գալստյանի քայլերը չէին համապատասխանում իրար»,- պատասխանեց Տեր-Գուլանյանը։ Իսկ առաջարկե՞լ է դիմում գրել և հեռանալ: «Էսպես խոսակցություն եղել է, բավականին տհաճ խոսակցություն։ Ես որոշեցի ինքս հրաժարական տալ, չնայած 2023 թվականին է ավարտվում իր պաշտոնավարման ժամկետը, բայց ես այդ էտապը համարում եմ ավարտված։ Բուլգակովի վեպում մի հատված կա, որ Պիղատոսին ասում է, որ ամենամեծ արատը վախկոտությունն է, այնպես որ, ո՛չ ես եմ վախկոտ, ո՛չ Լևոն Գալստյանը։ Այդ արատը դեռ ինձ չի քսվել և չի քսվի»,- ասաց Տեր-Գուլանյանը։