Ով աղբանոցից է դուրս եկել՝ աղբանոց է քաշում, պալատից է դուրս եկել՝ պալատ է քաշում
Հրապարակը գրում է. ԱԺ արտահերթ ընտրությունների ժամանակ «Հայաստան» դաշինքին սատարեցին եւ կոչով հանդես եկան հարյուրից ավելի մտավորականներ, որոնցից մի քանիսը, մեր տեղեկությունների համաձայն, բավական ակտիվ են եղել նախընտրական փուլում, ինչով կարողացել՝ աջակցել են, եւ այսօր կայանալիք հանդիպմանը նրանք էլ են հրավիրված։ Հիշեցնենք, որ Ռոբերտ Քոչարյանն այսօր հանդիպում է կազմակերպել իր կողմնակիցների, իրենց ակտիվի հետ, որը կայանալու է Դավթաշենի Prime Hall սրահում։
Մենք տեղեկացանք, որ հրավիրվածների թվում են նաեւ գրողներ Գուրգեն Խանջյանը, Լեւոն Ջավախյանը, բանաստեղծ Ռազմիկ Դավոյանը եւ ուրիշներ։ Այս անձինք, ի թիվս այլոց, Քոչարյանի կողքին էին, իսկ Ռազմիկ Դավոյանը նաեւ Ազատության հրապարակի բեմահարթակում էր։
Ռ․ Դավոյանին մի քանի հարց ուղղեցինք ընտրությունների եւ դրա արդյունքների վերաբերյալ։ Նա ասաց․ «Հազար խելոք մարդ խոսել է, իմ ասելը բան չի փոխի։ Եթե ուզում ես ինչ-որ ձեւով ազդեցություն ունենալ հասարակության, մարդկանց վրա, ովքեր ընտրություն են կատարում, սա ուրիշ խնդիր է, փնտրիր ուղիներ, ճանապարհներ, որտեղ քո պայծառ միտքը լուսավոր արահետներ կբացի, թե չէ, եթե ես էլ նստեմ վերլուծություններ անեմ՝ անհեթեթություն է։ Ուժ հավաքեք։ Առանց վերլուծելու էլ բոլորին հայտնի է, թե ինչու, որովհետեւ թելադրանքներ կան, եւ մեր ժողովուրդը հասունացած չէ, ով որտեղից դուրս է եկել, ժողովրդի հսկա մի զանգված քաշում է այնտեղ․ աղբանոցի՞ց է դուրս եկել՝ աղբանոց է քաշում, պալատի՞ց է դուրս եկել՝ պալատ է քաշում»։
Ընտրություններից հետո շատերի մոտ ճամպրուկային տրամադրություններ են, այս հարցում Ռ․ Դավոյանը եւս կտրուկ է․ «Դե եկեք ես եւ դուք էլ կապենք ճամպրուկները, վերջանա գնա․․․ թարգը տվեք նման խոսակցությունները»։
Հետևեք մեզ Viber-ում
