«Անդունդ» մեծացնելու հատուկ շնորհք

Երեկ Հայաստանի վարչապետ Նիկոլ Փաշինյանը շնորհավորական ուղերձ է հղել Ռուսաստանի Դաշնության նախագահ Վլադիմիր Պուտինին՝ Սահմանադրության մեջ փոփոխությունների հաստատման վերաբերյալ համառուսական քվեարկությունը հաջող անցկացնելու կապակցությամբ։

Ուղերձում, մասնավորապես ասված է․ «Այս իրադարձությունը, իհարկե, սկզբունքային նշանակություն ուներ Ռուսաստանի պետականության հետագա ամրապնդման համար: Վստահ եմ, որ երկրի հիմնական օրենքի մեջ կատարվող փոփոխությունները, որոնք արժանացել են Ռուսաստանի հասարակության ճնշող մեծամասնության հավանությանը, ստեղծում են երկրի հետագա առաջընթացի և նրա սոցիալ-տնտեսական զարգացման համար նպաստող պայմաններ: Մաղթում եմ Ձեզ և Ռուսաստանի Դաշնության եղբայրական ժողովրդին խաղաղություն, բարեկեցություն և բարգավաճում»:

Շնորհավորանքը կարելի էր համարել սովորական միջպետական արարողակարգի մի մաս՝ երկու պետությունների բարձրագույն իշխանությունների մակարդակով, եթե չլիներ այդ անհասկանալի մթնոլորտը, որն առկա է հայ-ռուսական հարաբերություններում:

Օրեր առաջ, ինչպես հայտնի է, Հայաստանի հանրային հեռուստաընկերությամբ Ռուսաստանում սահմանադրական փոփոխությունների վերաբերյալ ռեպորտաժի շրջանակում ցուցադրել էին Պուտինի մոլի ընդդիմադիր համարվող Ալեքսեյ Նավալնիին:
Թեմային անդրադարձել էր ռուս հայտնի լրագրող Վլադիմիր Սոլովյովը՝ նկատելով, որ նա ատում է հայերին և Հայաստանը։ «Տեսեք ինչ հետաքրքիր է։ Մենք այդքան սիրում ենք Հայաստանը, բարեկամ երկիր է, իսկ տեսեք՝ ում են ցույց տալիս մեր բարեկամ Հայաստանում՝ քվեարկության մասին մեկնաբանություններով։ Հայաստանի հանրային հեռուստաընկերությամբ սահմանադրական փոփոխությունների մասին ռեպորտաժի շրջանակում ցույց են տալիս նացիստ Նավալնիին, որը հայերին անվանել է Хач-եր, որը ատում է հայերին, ատում է Հայաստանը, արհամարհում է նրան։ Եվ դուք Հայաստանի հանրային հեռուստաընկերություն եք հանում այդ մարդուն և ցույց եք տալիս ձեր եթերո՞ւմ, «ну вы даете»»,- ասել էր Վլադիմիր Սոլովյովը։

Հայաստանի հանրային հեռուստաընկերությունը ՌԴ-ում սահմանադրական փոփոխությունների վերաբերյալ «Համառուսաստանյան հանրաքվեի վերջին և գլխավոր օրը. ընդդիմության և իշխանության տեսակետը» վերնագրով մոտ 3 րոպե տևողությամբ ռեպորտաժ էր պատրաստել։ Տեսանյութում ներառված էր նաև ռուս ընդդիմադիր գործիչ Ալեքսեյ Նավալնիի տեսաուղերձից մի հատված՝ հետևյալ բովանդակությամբ․ «Այն, ինչ հիմա տեղի է ունենում, մեծ հորինվածք է, որը ծածկում է գլխավորը՝ Պուտինի ժամկետի զրոյացումը։ Փոփոխությունների շրջանակում ամեն ինչի մասին գովազդում են, նույնիսկ՝ կատուների իրավունքների, բայց ոչ Պուտինի ժամկետի զրոյացման։ Եթե ուզում եք ձեր քաղաքացիական քայլով օգտակար բան անել, ոչ թե գնացեք քվեարկության, այլ պատմեք մարդկանց ճշմարտությունը, թե իրականում ինչ է տեղի ունենում»:

Հանրայինի ռեպորտաժից կարելի է թեմա չդարձնել, եթե հակառուսական որոշակի տրամադրությունները չհրահրվեին իշխանությունների կողմից: Ամբողջ հարցն այն է, որ եթե Հանրայինում որոշել էին համապարփակ ռեպորտաժ ցուցադրել՝ կարող էին, այսպես ասած՝ բոլոր կողմերի տեսակետը ներկայացնել:

Բայց սա էլ կարևոր չէ այնքան, որքան այն, որ Հայաստանի իշխանությունները չեն գիտակցում հայ-ռուսական հարաբերություններին հասցվող վնասն ու դրա հնարավոր բացասական հետևանքները:

Ոչ ոք չի ասում, թե Հանրայինում պետք է թույլտվություն խնդրեին Կրեմլից՝ Նավալնիի տեսակետը ներկայացնելու համար: Հարցը ծայրահեղականացնելու կարիք չկա:

Սակայն Հայաստանի իշխանությունները և նրանց ազդեցության տակ գտնվող քարոզչական ռեսուրսները պետք է անեն ամեն ինչ, որպեսզի Հայաստանն ու նրա հասարակությունը չտուժեն, որպեսզի Հայ-ռուսական հարաբերություններում ամեն առիթով, փոքր քայլերով «անդունդը» չմեծանա:

Մետաքսյա Շալունց