Լևոն Ջուլֆալակյանի առողջական վիճակի մասին մանրամասնում է Արսեն Ջուլֆալակյանը

ՀԱՕԿ-ի լրատվականից տեղեկացրել են, որ Հունահռոմեական ըմբշամարտի Հայաստանի ազգային հավաքականի գլխավոր մարզիչ Լևոն Ջուլֆալակյանը հոսպիտալացվել է Ուկրաինայում: Կիևի միջազգային մրցաշարի ընթացքում նրա մոտ սրտի խնդիրներ են առաջացել, որի հետևանքով տեղափոխվել է հիվանդանոց և այժմ բուժում է ստանում: Aysor.am-ը զրուցել է մարզչի որդու՝ Արսեն Ջուլֆալակյանի հետ: «Ամսի 3-ին՝ Կիև ժամանելուց մեկ օր հետո, հայրս սրտի հատվածում ցավեր է զգացել: Անմիջապես տեղափոխվել է հիվանդանոց: Փառք Աստծո, հիմա լավ է», - վստահեցրեց մեր զրուցակիցը: Լևոն Ջուլֆալակյանը հիվանդանոցից արդեն դուրս է գրվել, սակայն բժիշկների խորհրդով պետք է հանգիստ ռեժիմով ապրի: «Եղբայրս նրա մոտ է: Հիմա իրեն արդեն լավ է զգում, հյուրանոցում են: Բժիշկները խորհուրդ են տվել դեռևս ինքնաթիռ չնստել, մեկ շաբաթ այնտեղ մնալ: Մեկ շաբաթից կվերադառնան», - նշեց Արսեն Ջուլֆալակյանը: Շուտափույթ ապաքինում և առողջություն ենք մաղթում Լևոն Ջուլֆալակյանին: