Հենրիխ Մխիթարյանի վիճակագրությունն ու գնահատականը

Whoscored.com-ը ներկայացրել է «Մանչեսթեր Յունայթեդի» եւ Հայաստանի հավաքականի կիսապաշտպան Հենրիխ Մխիթարյանի վիճակագրությունը Լոնդոնի «Տոտենհեմի» դեմ Անգլիայի առաջնության 15-րդ տուրի խաղում։ Մխիթարյանը 3 հարված է կատարել դարպասին։ Դրանից մեկն ավարտվել է գոլով, որը հաղթանակ բերեց Մոուրինյոյի գլխավորած թիմին։ Մխիթարյանը կատարել է 22 փոխանցում՝ 68,2 տոկոս ճշգրտությամբ։ 27-ամյա ֆուտբոլիստը 1 անգամ խլել է գնդակը, 2 անգամ կասեցրել է մրցակցի գրոհը։ Հենրիխը 4 անգամ խախտել է կանոնները, ստացել է դեղին քարտ։ Նրա դեմ կանոնները խախտել են 1 անգամ։ Մխիթարյանը ստացել է 7,07 գնահատականը։ Ամենաբարձրը գնահատել է իսպանացի կիսապաշտպան Անդեր Էրերան (8,56), որը գոլային փոխանցում կատարեց Մխիթարյանին։ Հիշեցնենք, որ Անգլիայի առաջնության 15-րդ տուրում «Մանչեսթեր Յունայթեդը» 1:0 հաշվով հաղթեց «Տոտենհեմին» Հենրիխ Մխիթարյանի միակ գոլի շնորհիվ: Երկրորդ խաղակեսի վերջնամասում Հենրիխ Մխիթարյանը մրցակցի հետ պայքարում ոտնաթաթի վնասվածք ստացավ եւ դուրս բերվեց խաղադաշտից պատգարակով: «Մանչեսթեր Յունայթեդը» 24 միավորով մնաց 6-րդ տեղում: 5-րդ տեղում ընթացող «Տոտենհեմն» ունի 27 միավոր: «Մանչեսթեր Յունայթեդի» պաշտոնական թվիթերյան էջում անցկացված քվեարկությամբ հայ ֆուտբոլիստը ստացել է ձայների 87 տոկոսը՝ ճանաչվելով հանդիպման լավագույն խաղացող: NEWS.am Sport