«Արարատ»-ը ոչ-ոքի խաղաց «Տորպեդո»-ի հետ

Սոչիում ավարտին մոտեցող հավաքի երրորդ ստուգողական խաղում «Արարատ»-ը հանդիպեց Ռուսաստանի առաջին դիվիզիոնում հանդես եկող Արմավիրի «Տորպեդո»-ին: Համառ պայքարում անցած խաղն ավարտվեց 1:1 հաշվով, տեղեկացնում է ակումբի պաշտոնական կայքը: Առաջին խաղակեսում մեր թիմին կարող էր առաջ մղել Բենիկ Հովհաննիսյանը, սակայն վերջինիս` տուգանայինից կատարած հարվածը մի փոքր շեղ ստացվեց: Իսկ մրցակիցը առաջին կեսի վերջին վայրկյաններին կարողացավ գրավել Գևորգ Պրազյանի պաշտպանած դարպասը: Երկրորդ խաղակեսը «Տորպեդո»-ն սկսեց նոր կազմով, իսկ «Արարատ»-ի կազմում փոփոխություններ չկային: 56-րդ րոպեին հարձակման գիծ տեղափոխված Ումարու Կաինան կարողացավ խլել գնդակը մրցակցի պաշտպանից, մեն-մենակ մնաց դարպասապահի դիմաց և սառնասրտորեն գրավեց դարպասը` ձևակերպելով խաղի վերջնահաշիվը: «Արարատ». Գևորգ Պրազյան, Գորիկ Խաչատրյան, Նորայր Գրիգորյան, Սերգեյ Ավագիմյան, Վահե Մարտիրոսյան, Բենիկ Հովհաննիսյան (Մհեր Սահակյան), Գեորգի Խուբուա, Ռաֆֆի Կայա, Գևորգ Նռանյան, Ումարու Կաինա, Դավիթ Հովսեփյան (Արամ Շախնազարյան): Նշենք, որ փետրվարի 4-ին նախատեսված «Յուգ Սպորտ» թիմի հետ ստուգողական հանդիպումը չի կայանա: Փետրվարի 5-ին «Արարատը» կվերադառնա Երևան: