Մադրիդի «Ռեալ»-ը՝ Չեմպիոնների լիգայի գավաթակիր

Ավարտվեց Չեմպիոնների լիգայի գավաթի 2015/16թթ խաղարկությունը: Եզրափակչում Միլանի «Սան Սիրո» մարզադաշտում ուժերը չափեցին մադրիդյան երկու ակումբներ՝ «Ռեալ»-ն ու «Ատլետիկո»-ն: Արդեն հանդիպման 15-րդ րոպեին ստանդարտի խաղարկումից հետո հանդիպման հաշիվը բացեց Սերխիո Ռամոսը՝ առաջ մղելով «Ռեալ»-ին: Առաջին խաղակեսն ավարտվեց «Արքայական ակումբ»-ի առավելությամբ: Երկրորդ խաղակեսի մեկնարկում՝ 48-րդ րոպեին, հանդիպման գլխավոր մրցավար Մարկ Կլատենբուրգը 11մ հարված նշանակեց «Ռեալ»-ի դարպասին: Սեփական տուգանային հրապարակում խաղի կանոնները Ֆերնանդո Տորեսի հետ պայքարում խախտել էր Պեպեն: Անտուան Գրիզմանի հարվածից հետո գնդակը հետ մղվեց հորիզոնական դարպասաձողից: Դիեգո Սիմեոնեի սաները հաշվի հավասարակշռությունը վերականգնեցին 79-րդ րոպեին: Խուանֆրանի եզրային փոխանցումից հետո Դանիլոն հսկողությունից դուրս թողեց փոխարինման դուրս եկած Յանիկ Ֆերեյրա Կարասկոյին, ով մոտ տարածությունից գրավեց Կեյլոր Նավասի պաշտպանած դարպասը: Հանդիպման հիմնական ժամանակն ավարտվեց 1:1 հաշվով: Լրացուցիչ ժամանակում թիմերը խփած գնդակներով չփոխնակվեցին: Նշանակվեց հետխաղյա 11 մետրանոց հարվածաշար, որտեղ «Ռեալ»-ն առավելության հասավ 5:4 հաշվով: «Ատլետիկո»-ի կազմում վրիպեց Խուանֆրանը: