Այսօրվա իշխանությունը հեծած ավանակից պետք է իջնի․ գերաշնորհ տեր Միքայել Աջապահյան (video)

Կարծում եմ, որ մեր ելույթները տեղ հասան, և մարդիկ իրենց հետևություններն արել են։ Գուցե, մենք հրապարակային ներողության էինք սպասում, բայց, եթե մարդիկ հասկացել են իրենց սխալը, ոչինչ, թող ներողություն չխնդրեն։

Այս մասին Արմնյուզ ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է Շիրակի թեմի առաջնորդ, գերաշնորհ Տ Միքայել արքեպիսկոպոս Աջապահյանն՝ անդրադառնալով օրեր առաջ Վեհափառի դեմ սանձազերծված արշավին ու հոգևոր դասի պատասխանին։

Ըստ գերաշնորհ սրբազան հոր՝ կան մարդիկ, ովքեր իրենց երիատասարդական խանդավառությունը փորձում են բավարարել եկեղեցու հաշվին․ «Եկեղեցին պատրաստ է նման բաների՝ և՛ դիմագրավելու, և՛ պատասխանելու, և՛ ներելու, ինչը և մենք արեցինք»։

Դիտարկմանը՝ ո՞ր ժամանակաշրջանի հետ կհամեմատեք Հայաստանում այսօր տեղի ունեցող իրադարձությունները, Միքայելը նշել է. «Ինչպես 1920-ականներին հեղափոխականները եկան իշխանության և իրենց առաջին թիրախն ընտրեցին եկեղեցին, այդպես էլ այսօր է։ Զուգահեռներ շատ կան, բայց Աստված չանի, որ այս ամենի հետևանքներն էլ լինեն նույնական»։

Տ. Միքայել արքեպիսկոպոս Աջապահյանի խոսքով՝ եկեղեցու դեմ գնալ, եկեղեցու հետ կռվելը գուցե ժամանակավորապես հաջողվի, բայց երկար պայքարել հնարավոր չէ։

Հարցին՝ երկու տարի առաջ այս երիտասարդները իշխանության եկան սիրո ու թավիշի մասին կոչերով, մինչդեռ այսօր հաճախ տեսնում ենք ճիշտ հակառակը, գուցե ժամանակն է՝ հոգևորականների խոսքը հասանելի դարձնել, Տեր Միքայել Աջապահյանը պատասխանել է․ «Երիտասարդները պետք է հաղթահարեն որոշակի բարդույթներ, մասնավորապես՝ երբ եկեղեցականներին մեղադրում են անցյալում չխոսալու մեջ։ Այսպիսի խոսակցություններն այլևս ամոթ են։ Ես գոնե այն հոգևորականն եմ եղել, որ խոսել եմ միշտ»։

Տ. Միքայել Աջապահյանը հորդորում է այսօրվա երիտասարդներին այլևս չփնտրել հակահեղափոխականներ․ «Հակահեղափոխականությունից տեռորի հոտ է գալիս։ Ի՞նչ է՝ հակահեղափոխականներին պատրաստվում եք տեռորի՞ ենթարկել։ Կամ, երբ վարչապետն ասում է՝ սիրում եմ բոլորիդ, այդ բոլորի մեջ հակահեղափոխականները չե՞ն մտնում»։

Հարցին՝ կա տեսակետ, որ այս իշխանությունը հարձակվում է մեր ազգային արժեքների վրա, արդյոք սա ծրագրված է, սրբազանը պատասխանել է․ «Չեմ կարծում, որ ծրագիր կա, բայց այս խանդավառ երիտասարդներից շատերին թվում է՝ իրենք մեծ գործեր են արել։ 2018թ․ թավշյա հեղափոխությունն իրենք ավելի բարձր են դասում, քան՝ Արցախյան հերոսամարտը, Ապրիլյան պատերազմը, կամ էլ թե մեր եկեղեցու գործունեությունը, որովհետև իրենց մոտ այդ էյֆորիան դեռ չի մարել»։