«Իշխում է «պոֆիգիզմը»», «բոլորը սպասում են հարմար պահի, որ փախչեն»

Բելառուսի նախագահ Ալեքսանդր Լուկաշենկոն կրկին քննադատում է Եվրասիական միությունն ու դրա անդամ պետություններին` այս կառույցի, իր բնորոշմամբ, անմխիթար վիճակի համար:

«Այն ազատությունները, որ մենք ժամանակին հռչակել էինք, այսօր գործնականում գոյություն չունեն: Կամ էլ կան, բայց ոչ ամբողջական ծավալով, մեղմ ասած: Ապրանքների, ծառայությունների, աշխատուժի և կապիտալի ազատ տեղաշարժը մեր միության ստեղծման հիմքն է: Բայց արի ու տես, որ մինչ օրս մենք դրան չենք էլ հասել: Գիտե՞ք ինչու», - դիմելով Եվրասիական տնտեսական հանձնաժողովի կոլեգիայի նախագահ, Բելառուսի նախկին վարչապետ Միխաիլ Մյասնիկովիչին՝ հարցնում էր Լուկաշենկոն, ինքն էլ պատասխանելով իր իսկ հարցին՝ «պոֆիգիզմը»:

Դրա մեղավորն էլ, ըստ Լուկաշենկոյի, ԵԱՏՄ անդամ պետություններն են, որոնց, մեծ հաշվով, միևնույն է այս դաշինքի ճակատագիրը: «Ուրիշներն իրենց ուրիշ դաշինքներում են տեսնում, պարզապես մնացել են ԵԱՏՄ-ում և սպասում են հարմար պահի, որ դուրս փախչեն այնտեղից»,-նշել է Բելառուսի նախագահը:

Լուկաշենկոյի խոսքով, ի դեպ, Եվրասիական տնտեսական միությունը, միտված լինելով անդամ պետությունների միջև առևտրային սահմանափակումների վերացմանը, իրականում զարգանում է տրամագծորեն հակառակ ուղղությամբ:

«14 բացառություն, 37 սահմանափակում և 15 [պաշտպանիչ] պատնեշ գոյություն ունի այսօր ԵԱՏՄ-ում: Դրանք վաղուց պետք էր վերացնել, հակառակ պարագայում հարց է ծագում` ո՞րն է այս միության իմաստը, ի՞նչն է մեզ պահում այդ միության կազմում, եթե շուրջբոլորը միայն սահմանափակումներ են, պատնեշներ ու բացառություններ», - հռետորական հարցերի շարքը շարունակում էր Լուկաշենկոն` մեկ անգամ ևս խիստ քննադատության ենթարկելով Ռուսաստանի իշխանություններին:

«Մենք ինչպես միշտ շարունակում ենք ինտեգրման, իրական ինտեգրման կողմնակից մնալ, որը ստիպողաբար չպետք է իրականացվի: Այժմ ԵԱՏՄ-ում նոր տերմին է հայտնվել` «ինտեգրման պարտադրում», և չգիտես ինչու այդ պարտադրումը սկսվել է Բելառուսից: Ժամանակին, երբ մենք այս հարցերը քննարկում էինք Բորիս Ելցինի հետ, խոսում էինք իրական ինտեգրման մասին, որի արդյունքում, սակայն, որևէ մեկն իր ինքնիշխանությունը և անկախությունը չպետք է կորցներ: Իսկ երբ հարստացանք, հատկապես Ռուսաստանը, ի հայտ են եկել այս անհասկանալի քաշքշուկը, աղմուկը և ինտեգրման պարտադրումը», - նշում էր Լուկաշենկոն:

Բելառուսի նախագահն ընդգծել է նաև, որ դաշինքը ստեղծվում է, որպեսզի հավասար պայմաններ ապահովի ընկերությունների, ձեռնարկությունների և մարդկանց համար, բայց դաշինքի ստեղծվելուց ի վեր կողմերը հեռանում են այդ սկզբունքներից, սկսվում են անհասկանալի պահանջներ և ձգտում դեպի մենաշնորհ:
Այս էլ որերորդ անգամ Լուկաշենկոն ահազանգում է ԵԱՏՄ-ում, մեղմ ասած՝ ոչ այնքան բարվոք վիճակի մասին, ցույց տալով այդ կառույցի գոյության ոչ արդյունավետ լինելը:
Վաղուց որևէ մեկի համար գաղտնիք չէ, որ ԵԱՏՄ-ն, թեև տնտեսական համագործակցության կառույց է, սակայն անդամ պետություններն այնտեղ են քաղաքական պատճառներով և կմնան այնտեղ՝ նույնպես քաղաքական պատճառներով:

Մետաքսյա Շալունց