Ընդդեմ դոլարի ու հանուն Պուտինի հետ բարեկամության

«Խաղաղության ակունք» ռազմարշավը Սիրիայում կշարունակվի այնքան ժամանակ, քանի դեռ չենք արձանագրի առաջադրված նպատակների իրականացումը, ասվում է Թուրքիայի Ազգային անվտանգության խորհրդի հայտարարության մեջ, որի նիստը կայացել է երկրի նախագահ Ռեջեփ Թայիփ Էրդողանի նախագահությամբ:

Անվտանգության խորհուրդը նաև հույս է հայտնել, որ Ռուսաստանն ու ԱՄՆ-ն կկատարեն Թուրքիային տված խոստումները՝ կապված թուրք-սիրիական սահմանից «Ազգային ինքնապաշտպանության ուժեր» քրդական զորամիավորման նահանջի հետ: Անկարան զորամիավորումն ահաբեկչական խմբավորում է համարում և պահանջում է դուրս բերել գրոհայիններին Թել-Ռիֆաաթ և Մանբիջ քաղաքների տարածքից:

Միաժամանակ Թուրքիան շարունակում է ամուր պահել Ռուսաստանի հետ հարաբերությունները և դիմադրում է արևմուտքի ճնշումներին:

Պաշտոնական Անկարան հրաժարվել է աջակցել Ռուսաստանի կողմից «հարձակման» դեպքում Բալթյան երկրների և Լեհաստանի պաշտպանությանն ուղղված ՆԱՏՕ-ի ծրագիրը: Պարզվում է, Թուրքիան դաշինքից ավելի մեծ աջակցություն է ակնկալում Սիրիայում քրդերի դեմ պայքարի հարցում: «Անկարան ՆԱՏՕ-ում իր պատվիրակին ասել է չստորագրել ծրագիրը և հանդիպումների և մասնավոր զրույցների ընթացքում կոշտ դիրքորոշում ցույց տալ՝ պահանջելով, որ դաշինքը քրդական ինքնապաշտպանական ուժերը պաշտոնական ձևակերպումներում ճանաչի որպես ահաբեկիչներ»,- ասվում է հրապարակման մեջ:

Ի դեպ, նշվում է, որ սա ՆԱՏՕ-ում անհամաձայնությունների ևս մեկ վկայություն է դարձել, իսկ Թուրքիայի դիրքորոշումը կարող է խանգարել դաշինքի ամրապնդմանը Բալթյան երկրներում և Լեհաստանում:

Իսկ Էրդողանն իր հերթին շարունակում է ընդդեմ Թուրքիայի իր քարոզչական քայլերը: Իշխող «Արդարություն և զարգացում» կուսակցության խորհրդարանական խմբակցության ժողովի ժամանակ Թուրքայի նախագահը կոչ է արել ժողովրդին և գործարար շրջանակներին հրաժարվել դոլարից և վերադառնալ թուրքական արժույթին: «Մեր տնտեսությունը շարունակում է ամբողջ թափով վերականգնվել: Բոլոր տվյալները վկայում են այդ մասին: Իսկ մեզ բոլորն ասում են, որ մենք գնում ենք դեպի անդունդ: Թողե՛ք այդ դոլարը, եկե՛ք վերադառնանք մեր արժույթին: Թուրքական լիրան այլևս չի արժեզրկվում»,- ասել է Էրդողանը: Մինչդեռ Թուրքիայի իշխանությունների քննադատները հայտարարում են, որ Թուրքիան գտնվում է տնտեսական խորը ճգնաժամի մեջ:

Հիշեցնենք, որ ավելի վաղ Ռուսաստանն ու Թուրքիան համաձայնագիր էին կնքել ազգային արժույթներով հաշվարկների վերաբերյալ:

Իսկ ահա Թուրքիայի իշխանությունների այսօրվա պահվածքը կործանարար են որակում ԱՄՆ-ում: Ամերիկացի դեմոկրատ սենատոր Քրիս վան Հոլլենը հայտարարել է, որ Թուրքիան հատել է հերթական «կարմիր գիծը»՝ սկսելով փորձարկել Ռուսաստանից ձեռք բերած C-400 հակաօդային պաշտպանության համակարգերի ռադարները: Սենատորի կարծիքով՝ Թուրքիայի նախագահ Ռեջեփ Թայիփ Էրդողանն անհարգալից վերաբերմունք է ցուցաբերում ամերիկացի առաջնորդ Դոնալդ Թրամփի, ԱՄՆ-ի և ՆԱՏՕ-ի նկատմամբ: Հոլլենն ընդգծել է, որ ԱՄՆ օրենսդրությունը պարտավորեցնում է Դոնալդ Թրամփին պատժամիջոցներ կիրառել Թուրքիայի նկատմամբ:

Օրերս թուրքական մամուլում հայտնել էին, որ Թուրքիան սկսել է Ռուսաստանից ձեռք բերած С-400 հակաօդային պաշտպանության համակարգերի ռադարների աշխատանքի փորձարկումը, այդ նպատակով օդ կբարձրանան F-16 կործանիչներ և այլ ինքնաթիռներ:

Մետաքսյա Շալունց