«Արսենալը» 58 մլն ֆունտ է առաջարկում

Անգլիական «Արսենալ» ֆուտբոլային ակումբը լրջորեն հետաքրքրված է Հայաստանի ֆուտբոլի հավաքականի և Դորտմունդի «Բորուսիայի» ֆուտբոլիստ Հենրիխ Մխիթարյանով և 58 մլն ֆունտ (մոտ 85 մլն դոլար) է առաջարկել նրա տրանսֆերի համար։ Այս տեղեկությունը ստացվել է 168.am-ի ռուսաստանյան աղբյուրներից (ինչպես հայտնի է, «Արսենալի» խոշոր բաժնետերերից մեկը ռուսաստանցի միլիարդատեր Ալիշեր Ուսմանովն է)։ Սրանից մեկ շաբաթ առաջ Bild պարբերականը գրել էր, որ Մխիթարյանին ցանկանում է իր կազմում տեսնել նաև «Չելսին» և պատրաստ է վճարել 60 մլն եվրո։ Ուշագրավ է, որ 2-3 ամիս առաջ հայազգի ֆուտբոլիստի տրանսֆերային արժեքը 28 միլիոն եվրո էր, սակայն վերջին շրջանում նրա ցուցադրած խաղի արդյունքում այդ գինը բազմապատկվել է։ Գերմանիայի ընթացիկ առաջնությունում անցկացրած 29 խաղում Մխիթարյանը խփել է 11 գոլ և կատարել 13 արդյունավետ փոխանցում։ Իսկ Եվրոպայի լիգայում անցկացրած 15 խաղերում դարձել է 7 գոլի ու 9 գոլային փոխանցման հեղինակ։ Վերջին 1 տարվա ընթացքում, ըստ տարբեր լրատվամիջոցների, Մխիթարյանի նկատմամբ, բացի «Չելսիից» և «Արսենալից», հետաքրքրություն են ցուցաբերել նաև «Յուվենթուսը» և ՊՍԺ-ն։ Մխիթարյանի պայմանագիրը «Բորուսիայի» հետ ուժի մեջ է մինչև 2017 թվականը, սակայն բարձր գին առաջարկելու դեպքում չի բացառվում, որ դորտմունդյան ակումբը համաձայնի բաց թողնել մեր ֆուտբոլիստին։