Գործարքի ու խաղաքարտի արանքում

Թուրքիայի նախագահ Ռեջեփ Թայիփ Էրդողանը, ինչպես հայտնի է, նոյեմբերի 12-13-ը գտնվում էր Միացյալ Նահանգներում: Հայտնի է, որ ԱՄՆ կատարելիք այցի շրջանակում Դոնալդ Թրամփի հետ քննարկելու էր Վաշինգտոնի կողմից թուրք-ամերիկյան պայմանավորվածությունների չկատարման հարցը:

Թուրքիայի նախագահ Ռեջեփ Թայիփ Էրդողանը նախօրեին կայացած «Արդարություն և զարգացում» կուսակցության խորհրդարանական խմբակցության նիստում անդրադարձել է թուրք-ամերիկյան հարաբերություններին, ԱՄՆ Ներկայացուցիչների պալատի ընդունած բանաձևերին և Սենատում Հայոց ցեղասպանության մասին բանաձևի քննարկման հարցում վետո կիրառելուն:

Թեմային անդրադարձել է Milliyet լրատվականը: Էրդողանը, մասնավորապես, նշել է, որ թուրք-ամերիկյան հարաբերություններում առկա տարաձայնություններն «արհեստականորեն ուռճացվել են ԱՄՆ-ում գործող հակաթուրքական շրջանակների կողմից»:

Ըստ Թուրքիայի առաջնորդի՝ իրենց երկրների հարաբերությունների վատթարացմանն ուղղված քայլերի իրական բնույթը բոլորից լավ տեսնում է ԱՄՆ նախագահ Դոնալդ Թրամփը, ինչի շնորհիվ էլ իրենց հանդիպման ժամանակ իրենք «ապացուցել» են, որ ԱՄՆ Ներկայացուցիչների պալատի կողմից Հայոց ցեղասպանությունը ճանաչող բանաձևի ընդունումն «անարդար է և հակասում է պատմական ճշմարտությանը»:

Էրդողանը փաստել է նաև, որ իրենց հանդիպման արդյունքում «Սենատում առկա հայկական պնդումների մասին բոլոր քննարկումները ձախողվել են», և կիրառվել է վետո:
Հիշեցնենք, որ Միացյալ Նահանգների Կոնգրեսի Ներկայացուցիչների պալատում հոկտեմբերի 29-ին կայացած քվեարկության արդյունքում ձայների մեծամասնությամբ ընդունվել էր Հայոց ցեղասպանությունը ճանաչող բանաձևը։ Քվեարկությանը մասնակցած կոնգրեսականներից կողմ է քվեարկել 405-ը, դեմ՝ 10-ը, ձեռնպահ՝ 3-ը, իսկ 14 կոնգրեսական չի քվեարկել։

Սակայն Թրամփին մտերիմ սենատորներից մեկը` հանրապետական Լինդսի Գրեհեմը, Սենատում վետո էր կիրառել Հայոց ցեղասպանությունը ճանաչող բանաձևի հարցում:
Այսպիսով, Հայոց Ցեղասպանության ճանաչման բանաձևը դարձավ ԱՄՆ-Թուրքիա հարաբերություններում առևտրի թեմա, այսինքն՝ բացառապես քաղաքական խաղաքարտ:

Էրդողանին վախեցնելու բոլոր հարմար առիթներին ամերիկյան վարչակազմը այն դնելու է Թուրքիայի ղեկավարի սեղանին, իսկ երբ թուրք-ամերիկյան հարաբերությունները նորմալ հունի մեջ լինեն՝ այդ խաղաքարտը Էրդողանի առջևից հետ են վերցնելու:

Եվ այսպես շարունակ...

Մետաքսյա Շալունց