«Բատկան» նորից դժգոհ է Պուտինից. Զենք՝ ոչնչի դիմաց

Բելառուսի նախագահ Ալեքսանդր Լուկաշենկոն երեկ հայտարարել է, որ 2020-ին նախատեսված նախագահական ընտրություններին կառաջադրի թեկնածությունը: Նա ասել է, որ ընտրությունները հավանաբար տեղի կունենան գալիք տարվա ամռանը:

Հիշեցնենք, որ Ալեքսանդր Լուկաշենկոն 1994 թվականից մինչ հիմա Բելառուսի անփոփոխ նախագահն է:

Լուկաշենկոն նշել է, որ չի կառչելու նախագահական աթոռից, սակայն պատրաստվում է նախագահի պաշտոնը լքել միայն բելառուսցիների՝ իր թեկնածությունը մերժելուց հետո։ Ավելի վաղ Լուկաշենկոն հայտարարել է, որ չի պլանավորում փոխել երկրի սահմանադրությունը 2020 թվականի նախագահական ընտրությունների նախօրեին։

Ապա, նա քննադատել է Ռուսաստանին՝ նշելով, որ յուրաքանչյուր տարի տնտեսական նոր սահմանափակումներ են կիրառվում Բելառուսի դեմ: Նրա խոսքով, քանի դեռ չեն լուծվի Բելառուսին էներգակիրների մատակարարման հարցերը, և չեն հանվի առևտրային արգելքները, Ռուսաստանի հետ ինտեգրման «ճանապարհային քարտեզը» չի ստորագրվի:
«Վերջերս Բելառուսն իր գումարներով Ռուսաստանից գնեց Су-30СМ ինքնաթիռներ:

Բայց դրանով մենք կատարում ենք նաև Ռուսաստանի բնակչության անվտանգության ապահովումը: Ուրեմն ինչո՞ւ մեզ չօգնել: Մենք կարողանում ենք զենքից օգտվել ռուսներից ոչ պակաս լավ, սակայն դրա համար վճարում ենք ահռելի գումարներ»,-հայտարարել է Լուկաշենկոն:

Այս հայտարարությունը Բելառուսի նախագահն արել է 2017 թվականին պատվիրած 12 կործանիչներից առաջին երկուսի՝ Բելառուսի 61-րդ ավիաբազա բերվելու առիթով:
ՌԴ բարձրաստիճան պաշտոնյաներից մեկն էլ նշել է, որ Լուկաշենկոյի հայտարարությունը ցույց է տալիս նրա՝ կործանիչներն անվճար ստանալու հույսը, սակայն Ռուսաստանն առանց այն էլ ՀԱՊԿ գործընկերներին զենք է վաճառում Ռուսաստանի ներքին գներով, ոչ թե արտահանման արժեքով:

«Բելառուսի համար բացառություն անելը կնշանակեր, որ ստեղծվում է իրավիճակ, որը «կհնձի» ամբողջ զենքի վաճառքը ՀԱՊԿ-ում: Բացի այդ, Ալեքսանդր Գրիգորևիչը բավականին հետաքրքիր կարծիք ունի, թե որ միջոցներն են իր սեփականը, որը ոչ, քանի որ կա հավանականություն, որ այդ զենքերը նրանք գնել են հենց Ռուսաստանի կողմից վերցված վարկով»,- նշել է պաշտոնյան:

Նրա կարծիքով՝ Լուկաշենկոյի հայտարարությունները կապված են 61-րդ ավիաբազայում ռուսական կործանիչների տեղակայման վերաբերյալ Մոսկվայի և Մինսկի տարաձայնություններով:

Մետաքսյա Շալունց