Յուրի Խաչատուրովի որդին դատական հայց է ներկայացրել Սուրիկ Խաչատրյանի և նրա կնոջ դեմ

«Դ.Ի.Ա.Ր.-Պ.Ս.» ՍՊԸ-ն, ի դեմս ՀԱՊԿ նախկին գլխավոր քարտուղար Յուրի Խաչատուրովի որդու՝ Իգոր Խաչատուրովի, կրկին դատական հայց է ներկայացրել՝ ընդդեմ Սյունիքի նախկին մարզպետ «Լիսկա» մականունով հայտնի Սուրիկ Խաչատրյանի և նրա կնոջ՝ Լորետա Բարսեղյանի, հայտնում է Հայկական ժամանակը:

Հայցվորը պահանջում է պարտավորեցնել պատասխանողին՝ ինքնակամ քանդել կառույցը և դրանով զբաղեցված հողատարածքը նախկին վիճակին բերելու աշխատանքներին չխոչընդոտել: Հայցադիմումը դատարան էր ներկայացվել 2018 թվականի հոկտեմբերին, սակայն տեխնիկական խնդիրներ էին առաջացել:

Իգոր Խաչատուրովի ներկայացուցիչ Գուրգեն Մալխասյանը 2019-ի հուլիսի 11-ին նոր հայցադիմում է ներկայացրել: Գործը մակագրվել է Երևան քաղաքի ընդհանուր իրավասության դատարանի դատավոր Ռուբեն Ներսիսյանին:

Կայքի թղթակցի հետ զրույցում Խաչատուրովի ներկայացուցիչ Գուրգեն Մալխասյանն ասել է` տեխնիկական հարցեր են եղել՝ լրացուցիչ փորձաքննության անհրաժեշտություն է եղել, դրա համար էլ դատավարական տեսանկյունից որոշակի ժամանակ անց նորից նույն հայցը ներկայացրել են:

Հարցին՝ Սուրիկ Խաչատրյանն ու Լորետա Բարսեղյանը Իգոր Խաչատուրովին պատկանող հողատարածքի՞ն են տիրացել, Մալխասյանը պատասխանել է.

«Գուցե բանավոր համաձայնություն է եղել, օրինակ, բայց, ըստ իրենց ներկայացնելու, Իգոր Խաչատուրովի հոր հետ են ունեցել համաձայնությունը: Իրավունքի տեսանկյունից դա աննորմալ երևույթ է, որովհետև ոչ մեկի հայրը իրավաբանական առումով իրավունք չունի որոշելու իր զավակի գույքի ճակատագիրը»: