Ովքեր են մամուլին դատի տվողները և ինչ են պահանջում

Հրապարակը գրում է. Արդեն գրել ենք, որ, ըստ «Ինֆորմացիայի ազատության կենտորնի» տվյալների, ներկայումս 91 դատական հայց կա ընդդեմ մամուլի։ Գրել էինք նաև, որ բացի հրապարակված նյութի հերքումից պաշտոնյաները նաև խոշոր չափի դրամական փոխհատուցում են պահանջում՝ այդպես ցանկանալով վրեժ լուծել լրատվամիջոցներից և վերջիններիս կանգնեցնել ֆինանսական լուրջ խնդիրների առջև։ Ձեզ ենք ներկայացնում բոլոր այն դատական գործերը, որոնցում քաղաքական ու հասարակական գործիչները հայցեր են ներկայացրել ընդդեմ լրատվամիջոցի՝ շատ դեպքերում պահանջելով խոշոր չափի փոխհատուցում։

ԱԺ «Իմ քայլը» խմբակցության պատգամավոր Հայկ Սարգսյանը 6 դատական հայց է ներկայացրել ընդդեմ մամուլի, նա նաև դատի է տվել «Իրավունք» օրաթերթի լրագրող Իլոնա Ազարյանին և «Անդրադարձ» մամուլի ակումբին։

«Հրապարակի» դեմ դատական հայց ունի «Իմ քայլը» խմբակցության ևս մեկ պատգամավոր՝ Անդրանիկ Քոչարյանը, նա էլ պահանջում է 1 մլն դրամ։

ԲՀԿ առաջնորդ Գագիկ Ծառուկյանը դատական հայց է ներկայացրել ընդդեմ «Սոուշլ մեդիա» ՍՊԸ-ի, նա դրամական փոխհատուցում չի պահանջել։ Սյունիքի նախկին մարզպետ Վահե Հակոբյանը դատական հայցեր ունի ընդդեմ «Երկիր Մեդիա» հեռուստաընկերութան, «Սյունյաց աշխարհ» թերթի, յուրաքանչյուրից պահանջում է 2 միլիոն դրամ, «Սյունյան աշխարհ» թերթի դեմ քաղհայց ունի նաև «Զանգեզուրի պղանձամոլիբդենային կոմբինատի» գլխավոր տնօրեն Մհեր Պոլոսկովը՝ 1 միլիոն դրամ պահանջով։

ՍԴ դատավոր Ալվինա Գյուլումյանը դատական հայց ունի ընդդեմ Նիկոլ Փաշինյանի ընտանիքին պատկանող «Դարեսկիզբ» ՍՊԸ-ի՝ այլ կերպ ասած «Հայկական Ժամանակ» օրաթերթի։ ԵԿՄ նախկին նախագահ Մանվել Գրիգորյանը 2 դատական հայց ունի ընդդեմ «maxinfo.am» լրատվական կայքի, յուրաքանչյուր հայցով պահանջում է 3 միլիոն դրամ։ Դատարանը հետ է ուղարկել Գրիգորյանի հայցադիմումները։ Ռոբերտ Քոչարյանը դատական հայց ունի հնդդեմ «Սկիզբ մեդիա» ՍՊԻ-ի՝ «Լուսավոր Հայաստան» խմբակցության պատգամավոր Արման Բաբաջանյանին պատկանող «1in.am» կայքի։

Այս առումով ռեկորդակիր է հանրության լայն շրջանակներին հայտնի Ասյա խաչատրյանը, վերջինս դատի է տվել «Առավոտ» օրաթերթին, «Արարատ մեդիա դրուպ» ՍՊԸ-ին, «Օպերատիվ լրատվական» ՍՊԸ-ին, «168 ժամին», «Հենարան» մամուլի ակումբին։ Այս լրատվականները գործով 3-րդ կողմ են։