Հենրիխ Մխիթարյանն՝առաջատար 7 խաղացողների ցուցակում

Հայաստանի ֆուտբոլի ազգային հավաքականի ավագ, Դորտմունդի «Բորուսիա»-ի առաջատար Հենրիխ Մխիթարյանը ներառված է 7 խաղացողներից բաղկացած ցուցակում, որը, ըստ Eurosport-ի, լավագույն ֆուտբոլն է ցուցադրում հենց այս պահին: Լավագույնների շարքում են Մադրիդի «Ռեալ»-ի լավագույն ռմբարկու, 31-ամյա Քրիշտիանու Ռոնալդուն, «Ատլետիկո»-ի ֆրանսիացի հարձակվող Անտուան Գրիզմանը, Անգլիայի Պրեմիեր լիգայի առաջատար «Լեսթեր»-ի լավագույն ռմբարկու Ջեյմի Վարդին, «Տոտենհեմ»-ի 22-ամյա հարձակվող Հարրի Քեյնը, Մյունխենի «Բավարիա»-ի նոր առաջատար, բրազիլացի Դուգլաս Կոստան, «ատլետիների» կիսապաշտպան Կոկեն և «Բորուսիա»-ի առաջատար Մխիթարյանը: «27-ամյա հայ ֆուտբոլիստն անսպասելիորեն դարձել է Դորտմունդի և գերմանական Բունդեսլիգայի արքան: Ոչ ոք Գերմանիայում ավելի շատ գոլային փոխանցումներ չի կատարում, որքան Հենրիխը»,- գրել է հանրահայտ լրատվամիջոցը՝ վստահեցնելով իր ընթերցողներին, որ աշխարհի լավագույն և բազմակողմանի հմտություններով օժտված գլխավոր ֆուտբոլիստը հենց Մխիթարյանն է, ով դեռևս ընթացքի մեջ գտնվող ֆուտբոլային մրցաշրջանում հանդես է եկել 7 տարբեր խաղային դիրքերում՝ իր ուժերը փորձելով անգամ հենակետային կիսապաշտպանի դերում: Հիշեցնենք, որ այսօր` ապրիլի 14-ին կկայանա Եվրոպայի լիգայի գավաթի խաղարոկւթյան քառորդ եզրափակչի «Բորուսիա»-իև «Լիվերպուլ»-ի պատասխան դիմակայությունը: Հանդիպումը տեղի կունենա «Էնֆիլդ» մարզադաշտում Երևանի ժամանակով 23:05-ին: