Փաշինյանի թիմում հանուն օլիգարխիայի իրար դեմ են դուրս եկել․ ում օգտին կգրանցվի հաղթանակը

Բուքմեյքերական գրասենյակի աշխատակիցները այսօր վաղ առավոտից փակել են Բաղրամյան պողոտան։ Նրանք բողոքում են ԱԺ օրակարգ մտած «Վիճակախաղերի մասին» օրենքում փոփոխություններ կատարելու մասին նախագծի դեմ։
Նախագծի հեղինակն ԱԺ փոխնախագահ Ալեն Սիմոնյանն է, առաջարկվում է Երևան քաղաքից հեռացնել բոլոր բուքմեյքերական գրասենյակները։ Նախագիծն ընդունելու պարագայում այն ուժի մեջ կմտնի 2020 թ․-ի նոյեմբերից:
Ակցիայի մասնակիցները նշում են, որ օրենսդրական կարգավորումների հետևանքով մի շարք քաղաքացիներ կմնան առանց աշխատանք։ Նրանց խոսքով, բուքմեյքերական գրասենյակները փակելով՝ նպաստում են, որ օնլայն տիրույթում գործող ընկերությունների համար մենաշնորհ հաստատվի: Խոսքը շուկայում ամենամեծ տարածում գտած Վիվարո ընկերության մասին է, որը օնլայն տիրույթում կարելի է ասել գերիշխող դիրք ունի։ Որոշ տեղեկություններով Ալեն Սիմոնյանը համագործակցում է Վիվարոյի սեփականատերերի համար եւ հենց նրանց շահից է բխում նախագիծը։ Այսօր Ալեն Սիմոնյանը խոստովանել է, որ Վիվարոյի սեփականատերը իր ընկիերն է։ Իշխանության ներսում հովանավորներ ունեն նաեւ ցուցարարները, ամենաակտիվը Գուդվին ընկերության ներկայացուցիչներն են, այս ընկերությունը պատկանում է հայտնի գործարար Շինանյութի Սերոժին՝ Սերգեյ Մանուկյանին։ Նա ջերմ հարաբերություններ ունի Իմ Քայլի ամենաաղմկահարույց պատգամավոր Հայկ Սարգսյանի հետ։
Աժ-ում արդեն մի քանի ամիս է բուռն բանավեճ էր ծավալվել «Վիճակախաղերի մասին» ՀՀ օրենքում լրացումներ կատարելու մասին» օրենքի նախագծի շուրջ: Հիշեցնենք, որ Հայկ Սարգսյանն ու Սերգեյ Մանուկյանը համերկրացիներ են։ Սարգսյանը 2018-ին պատգամավոր է ընտրվել Գեղարքունիքի մարզից, ռեյտինգային ընտրակարգով, «Իմ քայլին» բերելով 11 եւ ավելի ձայն: Փաշինյանի «ախրաննիկ» լինելն ու նրա ջրի շիշը բռնելը Սարգսյանին այդքան ձայն բերելու հնարավորություն ամենևին էլ չէր տա, եթե չլիներ Շինանյութի Սերոժի եւ Նորատուսցի Ալիկ և Արա Բանդուրյաններ եղբայրների աջակցությունը։ Մամուլի տեղեկություններով եղբայրները փայ ունեն այս բիզնեսում։
Մամուլում օրերս տեղեկություն տարածվեց, որ Հայկ Սարգսյանի թանկարժեք այն կարմիր մեքենան, որը վերջերս վարում էր մայրաքաղաքի փողոցներում, գործարարն է նվիրել։ Պատգամավորն ասել է, որ դա իր ընկերոջն է, բայց նաեւ չի հերքել շրջանառվող լուրերը։ Կեսօրից հետո ցուցարարներին ընդունեց ԱԺ տնտեսական հանձնաժողովի նախագահ Բաբկեն Թունյանը։ Հանդիպումից հետո Գուդվինի տնօրենը լրագրողներին հայտնեց, որ բավարարված են հանդիպումից։«Գուդվին-Բետ» ՍՊԸ-ի գործադիր տնօրեն Սարգիս Միքայելյանը հայտարարեց, որ այս պահին գոհացնում է հանդիպման ընթացքում ձեռքբերված պայմանավորվածությունները:

«Այս պահին, ինչ պահանջ որ ունեին աշխատակիցները, ինչի համար հավաքվել էին, ինչի համար փողոց էին փակել, այո, գոհացնում է հանդիպումը: Պատգամավորները լսել են մեր բոլոր պահանջները և պարոն Թունյանը խոստացել է, որ առաջիկա օրակարգում դրանք քննարկվելու են»,- նշեց նա:
«Գուդվին-Բետ» ՍՊԸ-ի տնօրենը վստահեցնում է, որ իրենք «Վիվառոբետ» ընկերության դեմ պայքարելու խնդիր չունեն, այլ պայքարում են իրենց ընկերության հետագա գործունեության համար:
Հարցին, թե որևիցե կապ տեսնո՞ւմ են նախագծի հեղինակ, ԱԺ փոխնախագահ Ալեն Սիմոնյանի և «Վիվառոբետ» ընկերության միջև, Սարգիս Միքայելյանը պատասխանեց. «Որևիցե փաստական հանգամանք չեմ կարող նշել նախագծի հեղինակի և արտոնություն ստացող ընկերության միջև, բայց որ նախագիծն իր բովանդակությամբ ծառայում է այդ նպատակին, դա ակնհայտ է»: Փաստորեն Նիկոլ Փաշինյանի թիմակիցները իրար դեմ են դուրս եկել ու կռվում են նույն զենքով, որը Փաշինյանն է կրառել՝ փողոց փակելով։ Հետաքրքիր է՝ ինչ զարգացումներ կլինեն այսօրվա իրադարձություններից հետո եւ որ թեւը կհաղթանակի։

Անի Սահակյան