«Թեւերը կկտրեմ»,պալատական ինտրիգներ թույլ չեմ տա.Վարչապետը՝ Սանասարյանի գործի մասին (video)
Խոստանում է բոլոր նրանց «թեւերը կտրել», որոնք կփորձեն կառավարությունում պալատական ինտրիգներ անել, այսօրվա ասուլիսում հայտարարեց Հայաստանի վարչապետ Նիկոլ Փաշինյանը:
Նա մեկնաբանեց քրեական գործի հարցը, որով անցնում է ՊՎԾ ղեկավար Դավիթ Սանասարյանը: Վարչապետից, մասնավորապես, հետաքրքրվեցին՝ իրականությանն արդյոք համապատասխանո՞ւմ է այն տեղեկությունը, որ իշխանությունում «ճյուղեր» կան, որոնք խոչընդոտում են Սանասարյանի առնչությամբ արդարադատության իրականացմանը:
«Ես նմա՞ն եմ մարդու, որը լինելով վարչապետ՝ իշխանությունում այդպիսի «ճյուղեր» թույլ կտա: Գործադիր իշխանությունում չեն կարող «ճյուղեր» լինել: Դա միասնական մարմին է: Եթե այդպիսի «ճյուղեր» եւ «թեւեր» հայտնվեն, ես դրանք կկտրեմ: Սա իմ քմահաճույքը չէ, այդպիսին է պետական կառավարման տրամաբանությունը: Բացառված է, որ ես որեւէ հանգամանքում պալատական ինտրիգներ թույլ տամ: Մինչեւ «թեւերի» կտրելը չեն հասնի, որովհետեւ չեն աճի, այլ սաղմանավորման փուլում կչորանան»,- խոստացավ Փաշինյանը՝ խորհուրդ տալով, որ նրանք, ովքեր նման մտադրություններ ունեն, դրանցից հրաժարվեն:
Փաշինյանը նշեց, որ ԱԱԾ տնօրենը նախապես եկել է իր մոտ եւ առաջարկել գործի վարույթը փոխանցել ՀՔԾ, այդ թվում՝ նաեւ այն պատճառով, որ ԱԱԾ-ում վիրավորվում են կասկածների պատճառով: «Ես դեմ եմ նման որոշմանը, որովհետեւ կստացվի, որ մենք կառավարության մեջ չենք կարողանում, քաղաքական կամք չունենք մեզ հետ կապված գործերը քննելու համար, այլ տալիս ենք ուրիշին քննելու: Բայց եթե հանուն օբյեկտիվության պետք է փոխանցել ՀՔԾ-ին, այս հարցում բացարձակապես խնդիր չեմ տեսնում:Չխախտելով անմեղության կանխավարկածը՝ ցանկանում եմ արձանագրել ցավալի երեւույթներ: Ինչո՞ւ եղավ հեղափոխություն: Որպեսզի ընկերների եւ ոչ ընկերների հանդեպ լինի տարբե՞ր մոտեցում: Սանասարյանն իմ ընկերն էլ է, հետո ի՞նչ: Եթե նույնիսկ խոսքը վերաբերի իմ ընտանիքի անդամին, ինչպես արդեն ասել եմ խորհրդարանի ամբիոնից»,- նշեց Փաշինյանը՝ մեջբերելով Ֆրանկոյին՝ ընկերներին ամեն ինչ, թշնամիներին՝ օրենք: «Իմ տեղեկությունները միակողմանի չեն, ոչ միայն ԱԱԾ-ից են, իմ աղբյուրը իմ թիմի անդամներն են, Դավիթ Սանասարյանը: Բացառված է ոչ օբյեկտիվ քննությունը: Եթե հակառակը պարզվի, մեղավորները խստորեն կպատժվեն»,- հավաստիացրեց Փաշինյանը:
Հետևեք մեզ Viber-ում
