Նախագծով առաջարկվում է վարչական պատասխանատվություն սահմանել լիզենցիա չունեցող անձանց կողմից վարկային ծառայությունների գովազդումը լրատվության միջոցների, սոցիալական ցանցերի, էլեկտրոնային հաղորդակցման ցանկացած այլ միջոցների օգտագործմամբ, Կառավարության այսօրվա նիստում ՀՀ արդարադատության նախարար Արտակ Զեյնալյանը ներկայացրեց ԱԺ «Լուսավոր Հայաստան» խմբակցության պատգամավորների կողմից ներկայացված «Վարչական իրավախախտումների վերաբերյալ օրենսգրքում լրացում կատարելու մասին» նախագիծը։
«Մեր գործընկերների մտահոգությունը հետևյալն է, որ տարբեր տեղերում գովազդվում են վարկեր, փողեր, պարտքեր ու, որի հետևանքով առաջանում են խնդիրներ. մարդիկ, ժարգոնով ասած, տոկոսի տակ են ընկնում: ՀՀ օրենսդրությամբ կա հնարավորություն, առանց լիցենզավորման, նման օրինական ծառայություն մատուցվի:Մենք Կենտրոնական բանկի հետ շատ կարևորել ենք քաղաքացիների ֆինանսական գրագիտության բարձրացումը։ Մի բանում վստահ ենք՝ մենք պետք է անենք պետական ծրագրեր՝ քաղաքացիների ֆինանսական գրագիտությունը բարձրացնելու առումով», - ասաց ՀՀ վարչապետ Նիկոլ Փաշինյանը:
ՀՀ կենտրոնական բանկի նախագահ Արթուր Ջավադյանի խոսքով ասաց, որ այս ուղղությամբ բազմաթիվ ծրագրեր են իրականացնում։
«Այս պահին աշխատում ենք ԿԳՆ-ի հետ, վերապատրաստում են անցել բավականին մեծ թվով դասատուներ դպրոցների, ամբողջ քանակը դասատուների մոտ 12 հազար է Իմ առաջարկն այն է, որ շատ խիստ պատժվեն առանց լիցենզավորման գործունեություն ծավալնողները։Որովհետև 50 հազար դրամը շատ ավելի քիչ գումար է։ Կան արդեն հարուցված քրեական գործեր՝ ոչ լիցենզավորված գործունեություն իրականացնելու համար։ 50 հազարը ես չեմ կարծում, որ բավարար կանխարգելիչ միջոց է», - ասաց ԿԲ նախագահը։
Հարցին միջամտեց նաև փոխվարչապետ Մհեր Գրիգորյանը։
«Մի բան հարցնեմ էլի, եթե մենք բուն գործունեության հետ խնդիր չունենք, գովազդի հետ կապված ինչո՞ւ ենք խնդիր առաջացնում, գուցե, գործունեությունը արգելենք ու դրա համար սահմանենք վարչական պատասխանատվություն։ Սա եղավ էն կուրսայինների պատմությունը՝ բուն ֆունկցիայի հետ պրոբլեմ չունենք, բայց գովազդը արգելում ենք», - ասաց Մհեր Գրիգորյանը։
Նրա խոսքով՝ պետք է գործունեությունը արգելել ու այդ արգելքին չենթարկվելու դեպքում պատասխանատվության ենթարկել անձանց։
Նիկոլ Փաշինյանը ԿԲ նախագահից հետաքրքրվեց, ի վերջո, նախագծին կո՞ղմ են, թե՞ դեմ։
«Գրավոր տեքստում գրված է, որ բացասական եզրակացություն պետք է տալ, բայց ձեր բանավոր խոսքում ասում եք, որ շատ էլ լավ նախագիծ է։ Այստեղ կարող եմ կռահել, որ գործ ունենք հին իներցիայի հետ, քանի որ նախագիծը ներկայացված է ընդդիմության կողմից, ուրեմն պետք է մերժել։ Եթե դա է, ուրեմն շատ վատ իներցիա է», - ասաց Նիկոլ Փաշինյանը, ապա ավելացրեց. «Հիմա կո՞ղմ եք, թե՞ դեմ եք»։
«Կողմ ենք, պարոն վարչապետ», - ասաց Ջավադյանը։
«Համոզվա՞ծ եք, որ կողմ եք», - կատակեց Փաշինյանը։
Վարչապետն ընդգծեց՝ պաշտոնապես ասում է՝ այն, որ որևէ նախագիծ ներկայացրել է ընդդիմությունը, դա դեռ չի նշանակում, որ պետք է մերժվի։
«Այս պահից արձանագրենք այդ գործելակերպի ավարտը», - ասաց ՀՀ վարչապետը։
Այսպիսով՝ երկար քննարկումից հետո կառավարությունը կողմ քվեարկեց նախագծին։
Հետևեք մեզ Viber-ում
