«Ռեյտինգային համակարգի ևս մեկ արատի մասին՝ ինքնաբացարկ». Վահրամ Թոքմաջյան

Պատմաբան Վահրամ Թոքմաջյանը ֆեյսբուքյան իր էջում գրել է. «Ռեյտինգային համակարգի ևս մեկ արատի մասին՝ ինքնաբացարկ. Բազմաթիվ են այն անձինք, ովքեր ռեյտինգային համակարգով ստացել են մանդատ, բայց գրել են ինքնաբացարկի դիմում՝ կառավարությունում կամ որպես մարզպետ աշխատանքը շարունակելու համար: Սա մեղմ ասած, անբարեգութ վերաբերմունք է սեփական ընտրողի հանդեպ: Նորմալ է, երբ իշխող քաղաքական թիմը նշանակում է մարզպետներ և նախարարներ: Սակայն այդ մարզպետները կամ նախարարները նշանակովի պաշտոններ են, այլ ոչ ընտրովի: Ստացվում է, ինչ-որ մի խումբ դիտարկվում է որպես ձայն բերող, որը բազմաֆունկցիոնալ է: Մյուս կողմից, անբարեխիղճ վերաբերմունք է ընտրողի հանդեպ: Ինչո՞ւ: Ընտրողն ընտրել է կոնկրետ քաղաքական թիմ և այդ քաղաքական թիմից կոնկրետ մարդու: Ասել կուզե՝ պատվիրակել է այդ մարդուն, իր շահերը ներկայացնել ԱԺ-ում: Բայց արի ու տես, որ մարդն ասում է չէ, 10 կամ 20 հազար քվե ստացածն ասում է շնորհակալություն, բայց ես քեզ չեմ ներկայացնելու ԱԺ-ում: Ու առանձին առումով, այդ բազմաթիվ 10 կամ 20 հազար մարդիկ ներկայացուցիչներ չունեն ԱԺ-ում, իսկ դա վնաս է հենց ժողովրդավարություն կոչվածին: Լիարժեք համամասնական ընտրակարգի կիրառումը, ռեյտինգայինի բացառումով, կլուծի այս խնդիրը: Կենտրոնում կհայտնվի քաղաքական թիմն իր պատասխանատվությամբ, այլ ոչ թե անձինք, ովքեր կստանան քվե, իսկ օրեր անց, փաստացի կհրաժարվեն այդ քվեից»: