«Չպետք է պետությունը և հասարակությունն այսքան դաժան լինեն». Վարդան Հարությունյան

Հասարակական գործիչ, իրավապաշտպան, հրապարակախոս Վարդան Հարությունյանը ֆեյսբուքյան իր էջում գրել է. «Ցմահ ազատազրկման դատապարտված Արմենակ Մնջոյանը մահացավ կալանավայրում։ Ես նրան վաղուց էի ճանաչում, իսկ դատապարտվելուց հետո, երբ դեռ իմ մուտքը կալանավայրեր արգելված չէր, մի քանի անգամ այցելել եմ։ Մնջոյանի մահը պետք է որ ստիպի մեր իշխանություններին ու նաև հասարակությանը մեկ անգամ ևս անդրադառնալ ցմահ դատապարտվածների թեմային։ Խորհել, գուցե և վերաիմաստավորել այս պատժաձևի նկատմամբ ձևավորված վերաբերմունքը։ Պետք է փորձել խորանալ այս պատժամիջոցի էության մեջ ու հասկանալ, որ իր էությամբ այն անչափ դաժան է։ Չի կարելի մարդուն դատապարտել ցմահ ազատազրկման ու ջնջել նրան, մեկընդմիշտ մոռանալ նրա մասին։ Չպետք է պետությունը և հասարակությունը այսքան դաժան լինեն»: