Ոստիկանության 31-ամյա ծառայողը Jeep Grand Cherokee-ով բախվել է 80-ամյա վարորդի «06»-ին

Այսօր՝ հունվարի 4-ին, խոշոր ավտովթար է տեղի ունեցել Սյունիքի մարզում։ Ժամը 10։15-ի սահմաններում Սիսիան-Դաստակերտ ավտոճանապարհի 4.5 կմ հատվածում բախվել են Ախլաթյան գյուղի բնակիչ՝ 31-ամյա Արարատ Բաբայանի վարած Jeep Grand Cherokee մակնիշի 15 ՕՍ 326 համարանիշի և Աբովյան քաղաքի բնակիչ՝ 80-ամյա Պավլուշա Վարդանյանի վարած ВАЗ 2106 մակնիշի 35 QP 531 համարանիշի ավտոմեքենաները։ Ինչպես հայտնում է ֆոտոլրագրող Գագիկ Շամշյանը, վթարի հետևանքով 2 վարորդներն ու Պ. Վարդանյանի ուղևորներ՝ համաքաղաքացիներ, 47-ամյա Վարդանուշ Վարդանյանն ու 25-ամյա Էլիզ Իսրայելյանը մարմնական վնասվածքներով տեղափոխվել են Սիսիանի բժշկական կենտրոն։ Դեպքի վայր են ժամանել Ճանապարհային Ոստիկանության 2-րդ սպայական գումարտակի 6-րդ վաշտի 1-ին դասակի ծառայողները՝ վաշտի հրամանատար Գեղամ Մարգարյանի, դասակի հրամանատար Կարեն Օհանյանի գլխավորությամբ։ Վթարի մասին ՃՈ օպերատիվ կառավարման կենտրոնի պատասխանատու հերթապահ Դավիթ Գրիգորյանը տեղեկությունը փոխանցել է Ոստիկանության Սիսիանի բաժին, որտեղիղ ժամանել է օպերատիվ խումբը՝ համայնքային ոստիկանության տեսուչի գլխավորությամբ։ Փաստի առթիվ ՃՈ 2-րդ սպայական գումարտակի 6-րդ վաշտի հետաքննիչ Ս. Վարդանյանի կողմից նյութեր են նախապատրաստվում։ Ըստ նախնական տեղեկությունների՝ վթարի մեղավորը եղել է Jeep Grand Cherokee-ի վարորդ Ա. Բաբայանը, ով դուրս է եկել հանդիպակաց երթևեկելի գոտի, բախվել «06»-ին, այնուհետև հայտնվել մայթին։ Գ. Շամշյանի տեղեկություններով՝ Ա. Բաբայանն աշխատում է Ոստիկանության պետական պահպանության գլխավոր վարչության Սիսիանի բաժանմունքում։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: