Խոշոր ավտովթար Կոտայքի մարզում

Այսօր՝ դեկտեմբերի 28-ին, խոշոր ավտովթար է տեղի ունեցել Կոտայքի մարզում։ Ժամը 10։15-ի սահմաններում Երևան -Սևան ավտոճանապարհի 22-րդ կմ հատվածում բախվել են Տավուշի մարզի բնակիչ՝ 22-ամյա Արամ Միրզյանի վարած Mercedes մակնիշի 34 VA 494 համարանիշի և Երևանի բնակիչ՝ 34-ամյա Երջանիկ Խաչատրյանի վարած Mercedes մակնիշի 13 ՕՕ 006 համարանիշի ավտոմեքենաները։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի մարմնական վնասվածքներով տեղափոխվել է «Աբովյան» բժշկական կենտրոն։ Դեպքի վայր են ժամանել Ճանապարհային Ոստիկանության 2-րդ սպայական գումարտակի 3-րդ վաշտի 1-ին դասակի ծառայողները՝ վաշտի հրամանատար Արթուր Պետրոսյանի, դասակի հրամանատար Տիգրան Քոթանջյանի գլխավորությամբ։ Դեպքի վայրում հավաքվածներն ասում էին, որ օպերատիվ են գործել Աբովյանի հիվանդանոցի բժիշկները, վիրավորներին էլ հիվանդանոց է ուղեկցել վաշտի հրամանատար Ա. Պետրոսյանը։ Տեղում հետաքննչական աշխատանքները ղեկավարել է ՃՈ 2-րդ սպայական գումարտակի 3-րդ վաշտի ավագ հետաքննիչ Վահե Հարությունյանը, ում կողմից փաստի առթիվ նյութեր են նախապատրաստվում։ Ֆոտոլրագրողը հայտնում է, որ այս պահին ձյուն է տեղում, սակայն տեղի ճանշինը մինչ այդ կատարել է ճանապարհի մշակման աշխատանքներ՝ լցնելով աղ ու ավազ, սակայն ձյունը կարճ ժամանակում ծածկում է այն։ Վթարի պահին էլ ճանապարհը եղել է անցանելի։ Ոստիկանությունը պարզում է վիրավորի ինքնությունը։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: