«Եվս մեկ, երկրորդ անգամ արդեն կոչ եմ անում վարչապետ Նիկոլ Փաշինյանին՝ 2008թ. նախագահի՝ արտակարգ դրություն հայտարարելու հրամանագիրն օր առաջ վիճարկել ՍԴ-ում». Գագիկ Ջհանգիրյան/տեսանյութ/

«Բնականաբար, այդ դրվագը եղել է. հանգուցային պաշտոնների թեկնածությունների ցուցակ է ներկայացվել երկրորդ նախագահին, բայց դրա մոտիվը չի եղել պաշտոններ ստանալը կամ բաժանելը, որովհետև անձամբ ես երկու անգամ Ռոբերտ Քոչարյանին հրաժարականի դիմում եմ ներկայացրել իմ աշխատանքային գործունեության ընթացքում։ Մի անգամ Արդարադատության նախարարի տեղակալի պաշտոնից հրաժարականի դիմում եմ գրել, որը նա ընդունել է, իսկ 2-րդ անգամ՝ 2000թ. գարնանն եմ ներկայացրել, որը նա չի ընդունել»,- 24TV-ի եթերում, ի պատասխան այն դիտարկման, թե ՀՀ երկրորդ նախագահ Ռոբերտ Քոչարյանն իր «Կյանք և ազատություն» գրքում խոսելով 1999թ. հոկտեմբերի 27-ի իրադարձությունների մասին, երբ Խորհրդարանում տխրահռչակ Նաիրի Հունանյանի խումբը սպանդ կազմակերպեց, ասել է, որ դեռ զոհերի դիակները չսառած՝ վարչապետ Վազգեն Սարգսյանի շրջապատի մարդիկ իրեն ցուցակ են ներկայացրել, թե ով՝ ինչ պաշտոն պիտի զբաղեցնի, հայտարարեց նախկին զինդատախազ Գագիկ Ջհանգիրյանը։ Գագիկ Ջհանգիրյանը կարծում է, որ 1998թ. նախագահի հրաժարականից հետո իշխանության մեջ ղարաբաղյան թևը դիսբալանս ուներ, հայաստանյան ներկայությունը սակավ էր, և դա ավելի ընդգծվեց, երբ Հայաստանի նախագահի պաշտոնում տարբեր խարդավանքների միջոցով առաջադրվեց ոչ թե Վազգեն Սարգսյանը, այլ Ռոբերտ Քոչարյանը, ու 1999թ. խորհրդարանական ընտրությունների ժամանակ Կարեն Դեմիրճյանի հետ «Միասնություն» դաշինքը կազմելով՝ Վազգեն Սարգսյանը փորձեց լուծել այդ դիսբալանսի խնդիրը, բայց երկու թևերի մեջ պայքարը, այնուամենայնիվ, գնում էր։ «Երբ հոկտեմբերի 27-ի ահաբեկչությունից ընդամենը 1-2 ժամ հետո Ազգային անվտանգության նախարարի տեղակալ Գորիկ Հակոբյանը եկավ Կարեն Դեմիրճյանի աշխատասենյակ՝ Նաիրի Հունանյանի օպերատիվ գործը ձեռքին, այնտեղ գտնվող բանակային մեր պաշտոնյաների և ոչ միայն նրանց համար, պարզ էր, թե դահլիճում ով էր, և, փաստորեն, այդ անձն առնվազն գտնվել էր անվտանգության մարմինների տեսադաշտում։ Եվ այս իրավիճակում, երբ լարվածությունը հասավ գագաթնակետին, մենք գնացինք Պաշտպանության նախարարություն։ Այստեղ մի կարևոր պահ կա. որևէ մեկը չգիտեր, թե ինչ է լինելու, որովհետև մենք տեղեկություն ունեինք դալիճից, որ Ն. Հունանյանը ինչ-որ դրսի ուժերի է սպասում»,- նշել է նախկին զինդատախազը։ Նա համարում է, որ այդ ցուցակը կազմելու նպատակը երկրի անվտանգությունը հուսալի ձեռքերում տեսնելու համար էր, այլ ոչ թե որևէ պաշտոնից ստանալիք հավանական բարիքների համար։ Լրագրողի այն հարցին, թե ՀՀ երկրորդ նախագահ Ռ. Քոչարյանը նաև ասում է, որ Պաշտպանության նախարարն ապօրինի գործողություններ է կատարել՝ մասնավորապես՝ առանց իր հրամանի զորքը տեղաշարժելով, Գագիկ Ջհանգիրյանն ասաց, որ դրա համար Ռ. Քոչարյանը պատժել է Վաղարշակ Հարությունյանին՝ նրան աշխատանքից ազատելով ու զրկելով գեներալ-լեյտենանտի կոչումից, ինչի իրավունքը նա չուներ Սահմանադրությամբ։ «Վաղարշակ Հարությունյանը, իհարկե, իրավունք չուներ, առանց գերագույն գլխավոր հրամանատարի հետ համաձայնեցնելու՝ զորքը տեղաշարժել, ինչի իրավունքը չուներ նաև Միքայել Հարությունյանը 2008թ., եթե հավատանք Քոչարյանի այն պնդմանը, թե ինքը տեղյակ չի եղել դրանից։ Այդ դեպքում ինչո՞ւ նմանատիպ գործողության համար Միքայել Հարությունյանը չզրկվեց Պաշտպանության նախարարի պաշտոնից ու գեներալ-գնդապետի ուսադիրներից»,- նկատեց Գ. Ջհանգիրյանը։ Անդրադառնալով Ռոբերտ Քոչարյանի այն մտքին, թե ինքը նախագահ Քոչարյանից խնդրել է իրեն ազատել Ազգային ժողովին հաշվետու լինելուց, որովհետև պատգամավորներն իր վրա ճնշում են գործադրում, Գագիկ Ջհանգիրյանն ասաց, որ դա ճիշտ է, միայն թե՝ բոլորովին հակառակ ուղղությամբ։ «Ինձ սկզբում զանգահարել է Հանրապետության նախագահն ու ասել, թե արդյոք ինձ գլխավոր դատախազը ցուցում տվե՞լ է՝ չգնալ ԱԺ նիստին, ինչին ես ժխտական պատասխան եմ տվել։ Դրանից հետո նա ինձ հրավիրել է նախագահական ու տվել կարգադրություն՝ արգելելով ինձ մասնակցել նիստին ու պատասխանել պատգամավորների հարցերին»։ Գագիկ Ջհանգիրյանը կարծում է, որ այդ կարգադրության պատճառն այն էր, որ երևի թե պետք չէր, որ պատգամավորներն այդ ամբիոնից լսեին որոշ հարցերի պատասխաններ։ Նախկին զինդատախազ Գագիկ Ջհանգիրյանը չպատասխանեց այն հարցին, թե արդյո՞ք իր վրա՝ որպես «Հոկտեմբերի 27»-ի գործի նախաքննական մարմնի ղեկավար, ճնշումներ գործադրվել են, նշելով միայն, որ, եթե վերաբացվի գործի վարույթը, ինքը կխոսի ու կփորձի օգտակար լինել, իսկ այժմ ավելին ոչինչ չի ասի։ Խոսելով Ռոբերտ Քոչարյանի պաշտպանների այն հայտարարության մասին, որ իրենք անպայման հաղթելու են Մարդու իրավունքների եվրոպական դատարանում (ՄԻԵԴ), Գագիկ Ջհանգիրյանը հետևյալ կոչն արեց. «Եվս մեկ, երկրորդ անգամ արդեն կոչ եմ անում վարչապետ Նիկոլ Փաշինյանին՝ 2008թ. նախագահի՝ արտակարգ դրություն հայտարարելու հրամանագիրն օր առաջ վիճարկել Սահմանադրական դատարանում, որն ուղղակի պաշտպանական ամբողջ կորպուսին կզրկի որևէ արգումենտից։ Ինչքան էլ այդ Սահմանադրական դատարանը հին իշխանության կողմից ձևավորված լինի, սա ծայրահեղ հակասահմանադրական հրամանագիր է, և չեմ կարծում, որ ՍԴ անդամները չեն ճանաչի դրա հակասահմանադրականությունը»։