«Համառորեն առաջարկում եմ...». Համլետ Պետրոսյանը` Լիլիթ Մակունցին

Պատմաբան, հնագետ, մշակութաբան Համլետ Պետրոսյանը ֆեյսբուքյան իր էջում գրել է. «Համառորեն առաջարկում եմ: Տիկին Մակունցին մի քանի ամիս առաջ առաջարկեցի մի ներածական կուրս՝ մշակութային քաղաքականության և մշակութային ժառանգության վերաբերյալ: Չարձագանքեց: Նորից եմ պնդում: «Մշակութային քաղաքականություն և մշակութային ժառանգություն». հիմնական թեմաները` 1. Մշակութային քաղաքականության սահմանումները: 2. Մշակութային քաղաքականության մոդելները. հատուկ քննարկում. մշակութային քաղաքականության մոդելներն ըստ պետական մասնակցության. պետությունը որպես ոգևորող, պատրոն, ճարտարապետ, ինժեներ: 3. Մշակութային քաղաքականության հիմնաձևերը. հատուկ քննարկում. պահպանությամբ տարվելը, «մշակույթի թանգարանայնացումը» և դրա վնասները: 4. Երկու դաս Ֆրանսիայի մշակութային քաղաքականությունից` Անդրե Մալրո և Ժակ Լանգ. հատուկ քննարկում. մշակույթը բոլորի համար, մշակույթը յուրաքանչյուրի համար, ամեն ինչ մշակութային է: 5. Մշակութային քաղաքականությունը Հայաստանում. բնութագրման փորձ. հատուկ քննարկում. ինքության պահպանություն և մշակութային դեմոկրատացում. հակամետ խնդիրներ: 6. Մշակութային ժառանգություն. բնորոշումները. ՅՈՒՆԵՍԿՕ, գոյաբանական, իմացաբանական, սոցիո-մշակութային: 7. Մշակութային ժառանգության պահպանությանն ուղղված միջազգային հռչակագրերը. հատուկ քննարկում. մշակութային ժառանգության պահպանությունը ռազմական կոնֆլիկտների ժամանակ. Հաագայի 1954թ. հռչակագիրը և նրա արձանագրությունները: 8. Համաշխարհային մշակութային ժառանգության ցանկերը. կազմելու սկզբունքները, չափանիշային համակարգերը, հայ մշակութային ժառանգության ներկայացվածությունը. հատուկ քննարկում. համաշխարհային ոչ նյութական մշակութային ժառանգության ցանկում հայկական և ադրբեջանական անվանումների ընդգրկման պատմությունից: 9. Մշակութային ժառանգության հետազոտությունը որպես գիտական համակարգ թե՞ մշակութային քաղաքականություն. ամփոփիչ քննարկում. աղվանական մշակույթ, Տիգրանակերտ, մահմեդական հուշարձաններ»: