Բերդ քաղաքում մոր և որդու սպանությունը բացահայտվել է. ով է կասկածյալը

Տավուշի մարզի Բերդ քաղաքում մոր և որդու սպանության դեպքի առթիվ ՀՀ քննչական կոմիտեի Տավուշի  մարզային քննչական վարչության Բերդի քննչական բաժնում  քննվող քրեական գործով իրականացված անհետաձգելի քննչական և օպերատիվ-հետախուզական միջոցառումների արդյունքում սպանություն կատարելու կասկածանքով ձերբակալվել է Տավուշի մարզի 27- ամյա երիտասարդ: Այս մասին տեղեկանում ենք Քննչական կոմիտեի պաշտոնական կայքից: Ավելի վաղ հայտնել էինք, որ 2018թ. դեկտեմբերի 23-ի լույս 24-ի գիշերը Բերդ քաղաքի Ուտիքի փողոցի տներից մեկում ենթադրյալ հանցագործություն կատարած անձը սուր, կտրող-ծակող գործիքով հարվածներ է հասցրել նույն տան երկու բնակիչների, ովքեր ստացած մարմնական վնասվածքներից տեղում մահացել են: Նախաքննությամբ պարզվել է, որ վերջիններս մայր և որդի են: Դեպքի առթիվ ՀՀ ՔԿ Տավուշի մարզային քննչական վարչության Բերդի քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու կամ ավելի անձանց սպանություն): Ձեռնարկվում են անհրաժեշտ քննչական և դատավարական այլ գործողություններ՝ դեպքի բոլոր հանգամանքները պարզելու ուղղությամբ: «Փաստինֆո»-ն ավելի վաղ հայտնել էր, որ նրանց դիակները հայտնաբերել են հարեւանները եւ ահազանգել ոստիկանություն։ 87-ամյա կինն ու նրա 57-ամյա որդին ապրել են միասին։ Թե որն է սպանության պատճառն առայժմ չի հաղորդվում։ Սակայն շրջանառվող տեղեկությունների համաձայն՝ տանը հայտնաբերվել է գրություն, ըստ որի տղամարդուն մեղադրել են բռնաբարության մեջ։