Եթե ակցիայի մասնակիցներն առաջարկեն, Մանվել Գրիգորյանը պատրաստ է քննարկել նրանց հետ հանդիպման հարցը

Մանվել Գրիգորյանը մինչև կալանավորվելը ունեցել է շաքար, բայց ինսուլին չի օգտագործել, սակայն հիմա նրա շաքարը 25 է, և ինսուլինը պարտադիր է: Այս մասին Analitik.am-ի հետ զրույցում հայտարարեց Գրիգորյանի փաստաբաններից Լևոն Բաղդասարյանը. «Ամեն անգամ երբ պաշտպանական կողմը բարձրաձայնում էր, որ նա առողջական խնդիրներ ունի, լիազոր մարմինը դատաբժշկական փորձաքննություն էր նշանակում: Մանվել Գրիգորյանը տասնյակից ավել հիվանդություններ ունի, նրա թոքի կեսը հեռացրած է: Նման բացասական դինամիկայով անձին կալանքի տակ պահելը ուղղակի խոշտանգում է»: Պարոն Բաղդասարյանը նշեց, թե ցանկանում է, որ Հայաստանում հասարակությունը ոչ թե նայի անձի բացասական կամ դրական լինելուն, այլ՝ այդ անձի իրավունքի խախտված լինել կամ չլինելը. «Դրանք լրիվ տարբեր բաներ են: Եթե Մանվել Գրիգորյանի փոխարեն ուրիշ անձնավորություն լիներ, նման գործարքներ կիրակացնե՞ր լիազոր մարմինը, վստահ եմ, որ ոչ: Փաստն այն է, որ ազատ արձակվելուց հետո Մանվել Գրիգորյանի հիվանդությունն ավելի է խորացել»: Հարցին, ճիշտ են արդյո՞ք լուրերը, որ պարոն Գրիգորյանի ազատվելուց հետո հրավառություն է կազմակերպվել, փաստաբանն ասաց, որ վերջինս իր առողջական խնդիրներով է զբաղվում. «Պաշտոնապես հայտարարում եմ, որ այդ լուրերն ամբողջությամբ սուտ են: Եթե իշխանությունը լեգիտիմ է, ուրեմն պետք է բացառել փողոց փակելու մշակույթը և ընդունել դատական ակտը, հակառակ պարագայում, ինչպես արդեն բարձրաձայնել եմ, պետք է հավաքվել հրապարակում և լուծարել դատարանները, հետո բութ մատի օգնությամբ որոշել մարդուն դատելու կամ ազատելու հարցը: Ի՞նչ է նշանակում այն, որ օրինական ստացած դատական ակտը մի քանի հոգի փորձում են վիճարկել և փողոց փակել: Երեկ փակում էին Վեհափառի ճանապարհը, այսօր՝ Մանվել Գրիգորյանի, վաղն էլ, հարգելի լրագրող, քո ճանապարհն են փակելու, եթե մի քանի հոդվածների հետ համակարծիք չլինեն, մյուս օրը պատգամավորի կամ նախարարի: Դա պետք է բացառել, քանի որ Հայաստանում տեղի է ունեցել իշխանափոխություն, և ժողովուրդն էլ օրինական ձևով ընտրել է իր իշխանավորին»: Ինչ վերաբերում է հարցին, պատրաստվում է արդյո՞ք Գրիգորյանն ինչ-որ կերպ դիմել իր ազատման դեմ բողոքի ակցիա անող քաղաքացիներին կամ պատրաստ է արդյո՞ք հանդիպել նրանց հետ, եթե նման առաջարկություն լինի, փաստաբանն ասաց, որ առաջարկություն լինելու դեպքում կքննարկեն: