Մայիսի տասից ոստիկանությունում չկան կոռուպցիոն դրսևորումներ, կաշառակերությունն իսպառ վերացված է. Վալերիյ Օսիպյան

ՀՀ ոստիկանապետ Վալերիյ Օսիպյանն այսօր Azatutyun.am-ի ֆեյսբուքյան մամուլի ասուլիսին նշեց, որ պատրաստակամ է նոր կառավարության ձևավորումից հետո էլ շարունակել իր աշխատանքը: «Մայիսի տասից ոստիկանությունում չկան կոռուպցիոն դրսևորումներ, կաշառակերությունն իսպառ վերացված է»,- ասաց նա: Խոսելով ձեռքբերումներից՝ ոստիկանապետը կարևորեց ընտրությունների անցկացման հարցում ոստիկանության դերակատարությունը: Ինչ վերաբերում է նախկինում եղած իրավիճակին, նա ասաց. «Ես ականատես չեմ եղել, որ ոստիկանությունը ներգրավված է անթույլատրելի գործընթացի մեջ, բայց չեմ բացառում դա, քանի որ նախկին տարիներին տեսել եմ ոստիկանների, որոնք ոչ բարեխիղճ էին, ընտրությունների մասով, ինչու չէ, նաև ընտրակաշառքի բաժանումների մասով, որոնք տեսել, նկատել են, բայց չեն արձանագրել»: Օսիպյանը վերջին ընտրությունները եզակի համարեց այն առումով, որ ոստիկանապետը որևէ ոստիկանի նկատմամբ չունի նշանակված ծառայողական քննություն, այսինքն՝ չկա որևէ բողոք, թեև չհերքեց, որ մանր թերություններ եղել են: «Ունենք բացթողումներ, բոլոր ծառայություններում կան թերություններ, բայց վստահ եմ, որ 2019 թվականին կվերանայենք այդ ամենը»,- ասաց նա: Ինչ վերաբերում է Ճանապարհային ոստիկանության գործունեությանը, քաղաքացիների մտահոգություններին, թե կատաստրոֆիկ վիճակ է, Վալերիյ Օսիպյանը նշեց, որ երբ վարչապետին զեկուցում է, երբեմն դիտողություններ են լինում: «Նախորդ տարվա նույն ժամանակահատվածի համեմատ մոտ 1300 արձանագրություն ճանապարհային ոստիկանների կողմից ավելի է արձանագրվել: Այսինքն՝ ո՞նց կարելի է չաշխատել և 1300 ավելի արձանագրություն կազմել»,- ասաց նա: Ըստ ոստիկանապետի՝ հեղափոխությունից հետո քաղաքացին ավելի պահանջատեր է դարձել, իր իրավունքները լավ գիտի: «Ցո՛ւյց տվեք մի երկիր, որ խցանում չլինի, որտեղ ուղղակի կես ժամ, մեկ ժամ խցանումների մեջ չլինեն»,- ասաց նա՝ հավելելով, որ օրերս է վերադարձել հարևան Վրաստանից, որտեղ ևս կային խցանումներ: Վալերիյ Օսիպյանը նշեց, որ մտահոգություն կա, սակայն չհամաձայնեց, որ ճանապարհներին խայտառակ վիճակ է տիրում: Նա հիշեցրեց, որ մոտավորապես 13 միլիարդի կարգի տուգանքներ ներվել են, և չբացառեց, որ կլինեն վարորդներ, ովքեր կմտածեն՝ հիմա խախտում անեն, կգա ժամանակ, էլի կհամաներվեն: «Ոչ, այդպիսի բան չի լինելու, գնալով ավելի ենք խստացնելու: 2019 թվականին, վստահ եմ, կանցնենք բալային համակարգի, և այն հենց առաջին ամսում կտա իր արդյունքները»,- ասաց նա: