«Ճանաչեք և ընդունեք մեզ». ոլորտի պատասխանատուների բացթողումը

Առհասարակ, քաղաքակիրթ հասարակության բարձրագույն արժեքը մարդն է` նրա կյանքն ու առողջությունը, հետևաբար, առողջ սերունդ ունենալու համար, յուրաքանչյուր պետություն  պետք է ձեռնամուխ լինի առողջապահական հիմնախնդիրների  լուծմանը, ոլորտում առկա մի շարք հարցերի ու բացթողումների  վերացմանը: ,,Արև երեխաներ,,   հասարակական կազմակերպությունը, որը  զբաղվում է Դաունի համախտանիշ ունեցող երեխաների առողջության և զարգացման խնդիրներով, եկել է այն համոզման, որ այսօր Հայաստանում Դաունի համախտանիշ ունեցող անձանց հետ կապված բազմաթիվ խնդիրներ պահանջ են դրել հանրային իրազեկման, համապատասխան ծառայությունների համալիր մոտեցման`  / հոգեբանական, տեղեկատվական, վերականգնողական/, որոնց բացակայության արդյունքում հրամայական է դարձել նման խնդիրների լուծման անհրաժեշտությունը: Օրերս,  «Անի Պլազա» հյուրանոցի Դվին սրահում, «Դաունի համախտանիշով երեխաների բժշկական տեղեկատվության հասանելիության բարելավում» ծրագրի շրջանակներում, կայացավ «Արև-երեխաներ» ՀԿ-ի կազմակերպած «Դաունի համախտանիշով երեխաների աջակցություն» թեմայի շուրջ  հանդիպում-քննարկումը, որին մասնակցում էին  ՀՀ կրթության, առողջապահության, աշխատանքի և սոցիալական հարցերի նախարարությունների, ՄԻՊ գրասենյակի, ՄԱԿ-ի հայաստանյան գրասենյակի աշխատակիցներ, ՀԿ ղեկավարներ,  տարբեր բուժհաստատությունների բժիշկ-մասնագետներ: «Արև-երեխաներ» ՀԿ-ի նախագահ Ռուզան Թամրազյանը, ներկայացնելով գործունեության նպատակը, իրականացվող ծրագրերն ու  արձանագրված խնդիրները,  նշեց, որ ծրագրի արդյունքում բացի տեղեկատվության լայն տարածումից, բուժաշխատողների իրազեկումից, Դաունի համախտանիշով երեխաների վարման կարգի չափորոշչի մշակումից և ընտանիքներին ցուցաբերված սոցիալական աջակցությունից,  թվով տասնհինգ` այս համախտանիշով ընտանիքների  փոխարեն հոգեբանական աջակցություն է ստացել  քառասունհինգ ընտանիք: Ռուզան Թամրազյանի համոզմամբ,  Հայաստանում Դաունի համախտանիշ ունեցող անձանց հետ կապված բազմաթիվ չլուծված խնդրիներից են հասարակության իրազեկման պակասը, վիճակագրական տվյալների  և համապատախան ծառայությունների համալիր բացակայությունը: «Տեղեկացվածության պակասը հիմնական խնդիրներից է, քանի որ դրա պատճառով շատ հաճախ մարդիկ խուսափում են ԴՀ  ունեցող անձանց հետ շփվելուց, անգամ  հասարակության մեջ հանդիպում են խտրական վերաբերմունքի դեպքեր, որի հետևանքով նման համախտանիշով երեխաները շատ դեպքերում դիտարկվում են  հասարակության ոչ լիարժեք  անդամ. Ավելին, այն  լուրջ խնդիր է ստեղծում հատկապես  նախադպրոցական և դպրոցական տարիքի երեխաների կրթական գործընթացում` մանկապարտեզ կամ դպրոց հաճախելու պարագայում: Մինչդեռ, պետք է իմանալ, որ այդ համախտանիշն ունեցող մարդիկ կարող են կրթվել, երկար կյանք ունենալ և աշխատել:  «Ճանաչեք և ընդունեք մեզ» կարգախոսն է կրում մեր ծրագիրը, որի շրջանակներում նկարահանվում է «Ես կարող եմ» վերնագրով սոցիալական տեսահոլովակը, ինչը նպատակ ունի ներկայացնելու, որ Արև երեխաներն էլ կարող են անել այն ամենը, ինչ մենք՝ բոլորս»,- ասաց ՀԿ-ի նախագահը: Հոգեբան Սոնա Գրիգորյանը խոսեց  հոգեբանական  այն հիմնախնդիրների մասին, որոնք նկատել է  Դաունի համախտանիշով երեխաների ընտանիքների հետ աշխատելիս:  «Շատ հաճախ բժիշկները տեղեկատվությունը հայտնում են  իրենց ունեցած կարծրատիպերի համաձայն,  հանկարծակիի բերելով ծնողին,  նրանք հոգեբանական ճմշում գործադրելով, նշում են թե երեխան հատուկ մասնագիտացված կենտրոնում պետք է ապրի և երկար կյանք չի ունենալու, նրան բույսի կյանք է սպասվում, ձեզ էլ՝ մեծ տանջանքներ, առաջարկում են հղիության ընդհատում, եթե դա հղիության ընթացքում է բացահայտվել»: Հոգեբանի  հավաստմամբ,  նման մոտեցման պարագայում  ծնողները ենթարկվում են լուրջ սթրեսի,  հետևաբար հատուկ  աշխատանք է անհրաժեշտ, որպեսզի նրանք փուլ առ փուլ հաղթահարեն այդ  խնդիրները, հասնեն ինքնաբացահայտման, հոգեկան հանգստության և ինքնօգնության մեխանիզմների ներդրման: Առավել ուշագրավ  էր  քննարկումների  ժամանակ մասնակիցների  հնչեցրած  տարբեր  տեսակետներն ու կարծիքները, որոնց շնորհիվ վեր հանվեցին  ոլորտի օրենսդրական բացերն ու   հրատապ լուծումներ պահանջող  մի շարք հիմնախնդիրներ: