«Լիդիանը» դիմել է դատարան ընկերության գործարար համբավը վերականգնելու համար. փաստաբան

zham.am լրատվական կայքը զրուցել է «Լիդիան Արմենիա» ընկերության իրավախորհրդատու Արմեն Մելքումյանի հետ, ով մանրամասնել է ընկերության կողմից բնապահպան-ակտիվիստների դեմ դատարան ներկայացված հայցերը: -Պրն. Մելքումյա՛ն, «Լիդիան Արմենիա» ընկերությունը հայց է ներկայացրել դատարան` կապված ակտիվիստների հետ: Ո՞րն է ձեր առաջադրած մեղադրանքը: -Մեղադրանքները բոլոր մեղադրյալների մասով, հիմնականում, նույնաբովանդակ են և կայանում են հետևյալում՝ վերջիններս հանդես են եկել «Լիդիան Արմենիա» ընկերության գործարար համբավը արատավորող հայտարարություններով և մեկնաբանություններով: Մասնավորապես՝ ընկերությանը մեղադրել են կոռուպցիայի մեջ: Օրինակ` թե «Լիդիան Արմենիա» ընկերության կողմից «Լույս» հիմնադրամին փոխանցվող 300.000 ՀՀ դրամը դիտարկվում է որպես կոռուպցիայի դրսևորում: Արդոք ընկերության կողմից իրականացվող տարատեսակ սոցիալական ծրագրերը, համայնքներում կատարված ներդրումները, «Լույս» հիմնադրամի շահառուները, որոնք հնարավորություն են ստացել կրթվել աշխարհի լավագույն բուհերում կարո՞ղ են դիտարկվել որպես կոռուպցիոն դրսևորումներ: -Ընկերությունը ակտիվիստների հետ բախումների ավելի սուր ժամանակահատվածներ է ունեցել: Ինչո՞ւ հենց հիմա դիմեցիք դատարան: -Տևական ժամանակ է, ինչ «Լիդիան Արմենիա» ընկերությանը հասցեագրված զրպարտություններ են հրապարակվում սոցիալական հարթակների օգտատերերի կողմից` հանձինս ակտիվիստների ու բնապահպանների, որոնք լայն տարածում են գտնում թե՛ համացանցում, թե՛ հասարակության այս կամ այն զանգվածներում՝ դրանով իսկ արատավորելով և կասկածի տակ առնելով ընկերության բարի համբավը: Պարզապես, այս ողջ ընթացքում ընկերությունը լայնախոհություն է ցուցաբերել մինչև այն պահը, երբ այս ամենը հասարակության կողմից դիտարկվել է որպես իրականություն: Այսինքն, եթե չես պատասխանում զրպարտողին, նշանակում է, որ դա ամենևին էլ զրպարտություն չէ: Հետևաբար, մենք որոշեցինք հարցին լուծում տալ օրենքով սահմանված կարգով և դիմեցինք դատարան: Օրենսդրությունն այս պարագայում մեղադրյալ կողմերից յուրաքանչյուրից նախատեսում է 2.000.000 ՀՀ դրամ բռնագանձում, սակայն մենք այս պահին միայն 1.000.000 ՀՀ դրամ բռնագանձման պահանջ ենք ներկայացրել: -Ինչպե՞ս են արձագանքել մեղադրյալ կողմերը ձեր` դատարան դիմելու նախաձեռնությանը: -Ակտիվիստների վարքագծում դիտարկվում է հուզականություն և խուճապի դրսևորում: Հավանաբար, վախեցած են: Մեր գործուղությունները մշտապես եղել են բաց ու թափանցիկ, և նման հանգուցալուծումը նրանց մոտ որոշակի վախի մթնոլորտ է ստեղծել: Հետո, օրենսդրությունը չի նախատեսում, որ նրանց առարկայազուրկ արտահայտությունների ու գործողությունների արդյունքում կայացրած մեր որոշումը, այն է` հարցին տալ լուծում իրավական ճանապարհով, պետք է քննարկվեր կամ նախապես տեղեկացվեր վերջիններիս: Եվ նման սին մոտեցումներով մարդիկ, իրականում, չեն էլ ցանկանում լսել մյուս կողմին: Նրանք իրենց պրակտիկայի ընթացքում սովորել են, որ կարելի է անել նման արտահայտություններ, անցնել թույլատրելիի սահմանները, իսկ արդյունքում պատասխանատվության չենթարկվել: - Ի՞նչ սպասելիքներ ունեք դատական գործընթացից: -Տեսե՛ք, տրամաբանությունը հետևյալն է՝ եթե դու նման արտահայտություններ ես անում, ապա այդ արտահայտությունների հիմնավորվածությունը և ամբողջական բեռը կրում ես ինքդ: Մենք այսօր պահանջում ենք, որ ներկայացվեն բավարար հիմքեր՝ արված արտահայտությունների համատեքստում: Վերջիններս հասկանում են, որ չեն եղել ու չկան ընկերության կողմից կոռուպցիոն ռիսկեր: Գուցե նրանց կողմից, մասնավորապես, սոցցանցերում բարձրացված աղմուկը նրա համար է, որպեսզի հասարակությանը ներկայացնեն մի տարբերակ, համաձայն որի՝ ընկերությունը դատական ճանապարհով է փորձում լռեցնել իրենց: Սակայն, մենք վստահ ենք, որ դատարանները նման ճնշումների չեն տրվի, և դրանք ոչ մի կերպ չեն ազդի արդարադատության վերականգնմանը: -Եվս մեկ հայցադիմում է ներկայացված Հայկական բնապահպանական ճակատի անդամ Լևոն Գալստյանի դեմ: Այսօր այդ գործով Երևանի առաջին ատյանի դատարանում  -Այո՛: Այսօր պրն. Գալստյանին ուղղված հարց է հնչեցվել, թե, ո՞ր արտահայտություններն է «Լիդիան Արմենիա» ընկերությունը դիտարկել որպես զրպարտություն և գործարար համբավն արատավորող: Վերջինս ուղղակի պատասխանից խուսափում էր և չէր խոստովանում, որ, այո՛, ես ընկերությանը մեղադրել եմ կոռուպցիայի մեջ: -Եվս մեկ հարց Ամուլսարի հանքի հետ կապված` տեղյակ ենք, որ միջազգային փորձագիտական խմբեր են ներգրավված աշխատանքների մեջ: Ո՞ր փուլում են աշխատանքները եզրակացությունների մասով: -Այդ գործողություններն իրականացվում են պետության համապատասխան մարմինների կողմից: Մենք ներգրավված չենք այդ գործընթացին, և ես տեղեկատվություն չեմ կարող տրամադրել այդ մասով: Սակայն, հարկ է նշել, որ ընկերությունը պատրաստակամ է ցանկացած հանդիպման, բաց է ցանկացած առողջ քննարկման, որն ունի օբյեկտիվ մոտեցումներ` կապված բնապահպանական ռիսկերի հետ: Համագործակցությունը ընկերության կողմից ցանկացած պարագայում եղել է, կա ու կլինի: -Եվ վերջին հարցը: Ամուլսարի հանքի հավանական շահագործման կամ աշխատանքների վերջնական կասեցման մասով հանրությունը ե՞րբ կարող է սպասել վերջնական հայտարարության: -Ինձ թվում է, որ պետական մարմինները ավելի ստույգ տվյալներ կարող են ձեզ հաղորդել: Այս պահին ընկերությունը պատրաստ չէ նման հայտարարությունների: Եվս մեկ անգամ ցանկանում եմ հավելել, որ «Լիդիան Արմենիա» ընկերությունը պատրաստակամ է ու բաց է ցանկացած բանակցության և համագործակցության: