«Լիդիան» ընկերությունը վարձակալած հողերի համար համայնքներին վճարել է շուրջ 920 հազար դոլար

«Լիդիան» ընկերությունը հրապարակել է վարձակալած հողերի համար համայնքներին արված վճարումները, որը կազմել է 920 883 դոլար: Ընկերության տարածած հաղորդագրության մեջ ասվում է. «Չնայած Ամուլսարի ծրագիր տանող ճանապարհների ապօրինի շրջափակմանը, ինչի հետեւանքով Ծրագիրը փաստացի կասեցված է արդեն գրեթե 6 ամիս՝ Լիդիանը շարունակել է պատշաճ իրականացնել Ամուլսարի ծրագրի ենթակառուցվածքների համար հողի վարձակալության դիմաց վճարումները շրջակա համայնքների բյուջեներ: Այսպես, 2018թ. Լիդիանը հողի վարձակալության դիմաց վճարել է ընդհանուր 920 883 ԱՄՆ դոլարին համարժեք դրամ, որից՝ Ջերմուկ/Գնդեվազ – 403 701 ԱՄՆ դոլարին համարժեք դրամ Զառիթափ/Սարավան – 265 955 ԱՄՆ դոլարին համարժեք դրամ Գորայք – 251 227 ԱՄՆ դոլարին համարժեք դրամ: Այս փոխանցումները մի քանի անգամ գերազանցում են այս համայնքեր վճարվող պետական դոտացիաները: 2008-2018թթ. ընթացքում հողի վարձակալության դիմաց Լիդիանն այս համայքներին վճարել է ընդհանուր առմամբ 5,1 մլն ԱՄՆ դոլար: Ամուլսարի ծրագրի տնտեսական ազդեցությունը շրջակա համայնքների վրա դժվար է թերագնահատել: Մինչ ճանապարհների ապօրինի շրջափակումը Ամուլսարի ծրագրում աշխատում էր մոտ 1400 մարդ, որից 428-ը շրջակա համայնքներից: Այսօր այս մարդկանց զգալի մասը դարձել է գործազուրկ: Միայն Լիդիանի կապալառու ընկերությունները 2017-18թթ. ընթացքում տեղի համայնքներից կատարել են ավելի քան 2,2 մլն ԱՄՆ դոլարի գնումներ: Գնումների 75%-ը իրականացվել է Ջերմուկ եւ Գնդեվազ համայնքներում՝ հիմնականում վառելիքի, սպասարկման, հյուրանոցների եւ տրանսպորտի ոլորտներում: 2008թ.-ից սկսած այս համայքներում սոցիալական զարգացման ծրագրերում Լիդիանն իրականացրել է ընդհանուր առմամբ 3,7 մլն ԱՄՆ դոլարի ներդրում: Այս ծրագրերի արդյունքում նորոգվել եւ բարեկարգվել են համայնքային նշանակության ենթակառուցվածքներ՝ ճանապարհներ, ոռոգման եւ ջրամատակարարման համակարգեր, կրթական հաստատություններ եւ այլն, ներդրվել են գյուղատնտեսական նորարարական ծրագրեր, աջակցություն է ցուցաբերվել համայնքներում փոքր բիզնեսի զարգացմանը, որի համար ներդրվել է 130 000 ԱՄՆ դոլար: Այս պահի դրությամբ, Ամուլսարի ճանապարհների ապօրինի շրջափակման հետեւանքով այս ծրագրերի մեծ մասը կասեցված է»: