Վալերի Օսիպյանը՝ քրեական հեղինակությունների՝ Հայաստան այցի մասին

Ոստիկանապետից այսօր լրագրողները հետաքրքրվել են, թե արդյոք ոստիկանության աշխատանքի համար խոչընդոտներ չեն ստեղծի քրեական հեղինակություններ Ալիկ Բանդուրյանը և Պետրոս Իսրայելյանը, որոնք արդեն ազատության մեջ են: Արձագանքելով քննադատություններին, թե այս իշխանությունների օրոք ևս քրեական հեղինակությունների ելումուտը երկիր ազատ է, Օսիպյանն ասաց. «Այսպես կոչված, «օրենքով գողերը», նախքան գող լինելը, մարդ են և օգտվում են Սահմանադրությամբ իրենց ընձեռված իրավունքներից ու պարտականություններից։ Սակայն այդ լուրերն իրականությանը չեն համապատասխանում։ Երբևէ, ձեզ ասում եմ պաշտոնապես, Հայաստանում կրիմինալը չի եղել հսկողության տակ այնպես, ինչպես այսօր է: Եթե դուք ուշադիր էիք, իսկ դուք ուշադիր եք, որևէ մեկը ընտրություններին իր կողմից նախաձեռնությամբ հանդես չի եկել, որովհետև դա ևս վերահսկվում էր ոստիկանության կողմից»։ Ոստիկանապետը հստակեցրեց, որ օրերս եղել է քրեական հեղինակություն համարվող Արտյոմ Կանևսկոյի (Հարությունյան)  հարազատի հիշատակի արարողությունը և նրանք հարազատներով այցելել են նրա շիրիմին։ «Հարազատներով այցելել են գերեզմանատուն, այնուհետև գնացել են նշելու։ Ոստիկանությունը դրա մասին տեղյակ է, նախապես էլ է տեղյակ եղել։ Օպերատիվ կանխարգելիչ միջոցառումներ է իրականացրել։ Եվ դուք, և հասարակությունը վստահ եղեք, որ մենք տիրապետում ենք ամեն մի փոքր տեղաշարժի»,-ասաց նա: