Երբ ավտոմեքենան վթարի է ենթարկվում, ուրեմն կամ վարորդն է վատը, կամ մեքենան է անսարք, կամ երկուսը միասին

Հրապարակախոս Կարինե Հակոբյանը ֆեյսբուքի իր էջում գրում է. Դարձյալ խոսում են Մշակույթի նախարարությունը փակել չփակելու մասին: Փոխարենը Մշակույթի նախարարությունը, որը մինչև հիմա կատարել է ԱՕՔՍ-ի դեր, նոր քաղաքականություն մշակի և կարողանա համակարգել այդ բարդ և կարևոր ոլորտը, որի մեջ է և՛ գեղարվեստական կրթությունն ու գիտությունը, և՛ հասարակության գեղագիտական դաստիարակությունը, և՛ հուշարձանների պահպանությունը, և՛ մշակութային արտաքին քաղաքականությունը, և.....: Մի խոսքով, այնպիսի մի ահռելի գործ կա անելու, եթե ուզում ենք ազգ դառնալ անկախ պետականություն ձեռք բերելուց հետո: Իսկ գուցե մեզ անկախությու՞ն էլ պետք չի: Անկախացանք, որ ի՞նչ անենք: Հարուստ ապրել մեզնից յուրաքանչյուրը կարող է և այլ պետության մեջ: Անկախություն ձեռք բերեցինք, որպեսզի հայ մնանք:Բայց ինչպե՞ս: Միա՛յն մշակութայի՛ն ինքնությամբ, որը սակայն ոչ ճանաչելն է հեշտ և ոչ էլ պահպանելն ու զարգացնելը: Դրա համար մեծ աշխատանք է պետք տանել. ծրագրված, մտածված աշխատանք, որն էլ պետք է լինի Մշակույթի նախարարության առաքելությունն ու գործառույթը:Երբ ավտոմեքենան վթարի է ենթարկվում, ուրեմն կամ վարորդն է վատը, կամ մեքենան է անսարք, կամ երկուսը միասին: Բայց դա չի նշանակում, որ ավտոմեքենա մեզ այլևս պետք չէ:Այն, որ մինչև այսօր մենք չենք ունեցել այդ պաշտոնում մարդ, որը հասկանար Մշակույթի նախարարության առաքելությունը, դա դեռ չի նշանակում, որ այդպիսի մարդիկ չկան: