Սպիտակցի Հայկոն հարցաքննվել է

Հետիոտնին մահվան ելքով կրկնակի վրաերթի ենթարկելու գործով Հայկարամ Ղևոնդյանը (Սպիտակցի Հայկո) հարցաքննվել է որպես վկա: Այս մասին ԼՈւՐԵՐ.com-ի թղթակցի հետ զրույցում հայտնեց Քննչական կոմիտեի լրատվության բաժնի պետ Նաիրա Հարությունյանը: Դեպքի առթիվ Քրեական օրենսգրքի 377-րդ հոդվածի 2-րդ մասով հարուցվել է քրեական գործ, կատարվում է նախաքննություն: «Քրեական գործով նշանակվել են դիակի դատաբժշկական, դատատոքսիկոքիմիական փորձաքննություններ, դատահետքաբանական, դատաքիմիական և մանրաթելային համալիր փորձաքննություն, դատաավտոտեխնիկական փորձաքննություն: Ա. Չիբուխչյանի նկատմամբ որպես խափանման միջոց է կիրառվել ստորագրություն չհեռանալու մասին: Հայկարամ Ղևոնդյանը քրեական գործով հարցաքննվել է որպես վկա»,- ասաց Հարությունյանը: Նախաքննությունը շարունակվում է: Հիշեցնենք, որ դեկտեմբերի 14-ին, ժամը 07։40-ի սահմաններում, Kia Sorento 7 մակնիշի ՊՆ 0032 Մ համարանիշի ավտոմեքենայի վարորդը՝ Արայիկ Չիբուխչյանը, Խանջյան փողոցում վրաերթի է ենթարկել փողոցը չթույլատրվող հատվածով անցնող 68-ամյա Քնարիկ Պետիկյանին։ Այնուհետև տուժածին կրկնակի վրաերթի էր ենթարկել մեկ այլ՝ Rang Rover մակնիշի ավտոմեքենա, որի ղեկին եղել է 46-ամյա Հայկարամ Ղևոնդյանը՝ Սպիտակցի Հայկոն: Համացանցում մեծ աղմուկ բարձրանալուց հետո, Սպիտակցի Հայկոն հանդես եկավ տեսաուղերձով, որտեղ անդրադարձավ մահվան ելքով վրաերթին: Նա, մասնավորապես, նշել էր. «Վրաերթը կատարվել է այլ մեքենայի վարորդի կողմից, իսկ ես այդ ճանապարհով անցել եմ րոպեներ անց: Քննությունը կատարվում է ոչ թե իմ, այլ վրաերթ կատարող վարորդի վերաբերյալ: Ես այդ գործով հանդիսանում եմ որպես վկա»,- նշել էր նա: