Արթուր Վանեցյանը եղբայրների օֆշորներում լինելու մասին

ԱԱԾ տնօրեն Արթուր Վանեցյանն այսօր հրավիրած ասուլիսում չհերքեց, որ իր ընտանիքը կապ ունի օֆշորային ընկերության հետ: Լրագրողները հարցրին, թե ԱԱԾ-ն զբաղվո՞ւմ է Վանեցյանի ընտանիքի օֆշորային գործերով, ասաց. «Հենց բան չի լինում ասելու, գրում են՝ Վանեցյանի օֆշորները»: Հիշեցրին, որ նրա հորեղբոր կինը, ով 79 տարեկան է, օֆշորային ընկերություն ունի, ըստ մամուլի հրապարակումների, 335 հազար դոլար տուգանվել է նախկին իշխանությունների օրոք: Արթուր Վանեցյանը նշեց, որ եղբայրը` Կարեն Վանեցյանը, 1980-ականների վերջից չի բնակվում Հայաստանում և միայն այս տարի է ստացել այստեղի քաղաքացիություն։ Վանեցյանի խոսքով՝ իր եղբայրը որևէ բիզնես շահ չունի Հայաստանում։ “Զեմֆիրա Վանեցյանը, այո, իմ հորեղբոր կինն է, որը ՀՀ-ում չի բնակվում 1988 թվականից: Այդ ընկերությունը պատկանում է եղբորս՝ Կարեն Վանեցյանին, ով շատ խոշոր գործարար է: Բայց նա ՀՀ տարածքում որևէ բիզնես չունի, հետաքրքրված էլ չէ: Նա ՀՀ քաղաքացիություն ստացել է այս տարի, զուտ նրա համար, որ տեղի ունեցավ հեղափոխություն, մտածեցին կգան այստեղ: Ինքը այսօր Երևանում է, ես խնդրեցի, ասացի՝ արի հետս, ինձ օֆշորից հարցեր են տալու, պատասխանիր, չեկավ”,- ասաց Արթուր Վանեցյանը: Նա նշեց, որ օֆշորն ու օֆշորային ընկերությունը հանցագործություն չէ, այլ բիզնես գործիք է, որն օգտագործվում է աշխարհի տարբեր գործարարների կողմից: Նա ասաց, որ ինքը որևէ տնտեսական գործունեություն չի իրականացնում, իր անունը չկա օֆշորային գոտիներում: