ՌԴ-ի հետ այնպիսի հարաբերություններ կդարձնենք, որ Ռուսաստանը այլևս կհրաժարվի Ադրբեջանին զենքեր վաճառել. Է. Մարուքյան

  ««Լուսավոր Հայաստան» կուսակցությունն ունի արտաքին քաղաքական լուրջ ծրագիր, որը ենթադրում է ԵՄ-ի հետ ռազմավարական հարաբերություն, ՌԴ-ի հետ այնպիսի հարաբերություններ, երբ Ռուսաստանը այլևս կհրաժարվի Ադրբեջանին զենքեր վաճառել:  ԼՀԿ-ն՝ որպես ազատական քաղաքական միավոր, հիմնադրվել է 3 տարի առաջ և այդ տարիների ընթացքում ցույց է տվել, որ սկզբունքային, գաղափարական, պրոֆեսիոնալ մարդկանց թիմ է, որը միշտ պայքարել է մարդկանց իրավունքների համար»,- Հանրային հեռուստաընկերության եթերում ընտրություններին մասնակցող 11 քաղաքական ուժերի առաջին համարների բանավեճին հայտարարեց «Լուսավոր Հայաստան» կուսակցության ցուցակը գլխավորող Էդմոն Մարուքյանը: «Ապրիլի 17-ին մենք  դեմ ենք քվեարկել Սերժ Սարգսյանի պաշտոնավարման 3-րդ ժամկետին: ԼՀԿ ծրագիրը վերաբերում է տարածքային համաչափ զարգացմանը:  Մենք Հայաստանում խոսել ենք այդ համակարգի անարդյունավետ լինելու մասին, որտեղ մի քաղաք է զարգացել, իսկ մնացած համայնքները մնացել են արդարացիորեն չզարգացած»: «Լուսավոր Հայաստանը» նաև ներկայանում է Հարկային օրենսդրության փոփոխությունների փաթեթով, որտեղ ՓՄՁ-ն կլինի պաշտպանված, հարկային բեռը՝ թեթև, իսկ աշխատողների իրավունքները կլինեն պաշտպանված: «Մեր հայտը ապագա խորհրդարանում 2-րդ քաղաքական միավոր լինելն է: Մեր հանդիպումները քաղաքացիների հետ ցույց են տվել, որ ՀՀ քաղաքացիները մեզ տեսնում են 2-րդ քաղաքական ուժ ապագա խորհրդարանում»,- նշեց Է. Մարուքյանը: