ԱԱԾ տնօրեն, ՀՔԾ պետ և վարչապետ «տրոյկան» է որոշում՝ ով պետք է «նստի», ով՝ ոչ. Վ. Սարգսյան

«Որքան էլ տհաճություն զգացվեց,   նորից նոր գաղտնալսում և այլն, բայց նորությունն այն էր այսօրվա, որ անցումային արդարադատություն ունենք, այն անցնում է ԱԱԾ տնօրենի, ՀՔԾ պետի միջոցով դեպի վարչապետ, և այդ «տրոյկան», կարծես թե, ձևավորված է և որոշում է կայացնում՝ ով պետք է նստի, ով պետք է չնստի, դատարանն ինչ պետք է որոշի: Պարզվեց, որ դատավորն, այնուամենայնիվ, զանգել է ԱԱԾ տնօրենին»,-Հանրային հեռուստաընկերության ուղիղ եթերում ԱԺ ընտրություններին մասնակից ուժերի ցուցակները գլխավորողների նախընտրական բանավեճի ժամանակ  Հայաստանի Հանրապետական կուսակցության ներկայացուցիչ Վիգեն Սարգսյանն անդրադարձավ  հրապարակված երկրորդ գաղտնալսման ձայնագրության հրապարակմանը: «Եթե այդպիսի որոշում կայացված լիներ, ձեր կուսակցության 90 տոկոսն արդեն նստած կլիներ, պարո՛ն Սարգսյան, և շատ հնարավոր է՝ նաև դուք նստած լինեիք, պարո՛ն Սարգսյան»,-ընդհատեց «Իմ քայլը» դաշինքի ցուցակի գլխավորող Նիկոլ Փաշինյանը: «Բայց ես Ձեզ ուզում եմ ասել, որ Ձեզ էլի սխալ թիվ են տվել ձեր օգնականները՝ կապված ծառայությունների բաժնի հետ տնտեսության մեջ, որին անդրադարձաք»,-պատասխանեց Վիգեն Սարգսյանը և  նշեց, որ աճի տոկոսը ոչ թե խաղադրույքներից է եղել, այլ որովհետև IT հարյուրավոր ոլորտի մասնագետներն աշխատում են տարածաշրջանային առաջնորդ լինելով այդ ծառայությունը այլ երկրներին մատուցելու: «Դա մեծ տարբերություն է, և խնդրում եմ՝ մինչև որոշում կայացնելը անպայման հանձնարարեք մանրամասն զեկուցել, որովհետև կարող եք կրճատել երիտասարդների թիվը, որոնք բարձր աշխատավարձով աշխատում են»,-ասաց նա և նշեց, որ իրենց ձեռքբերումներից էր, որ ՀՆԱ-ի մեջ ՏՏ ոլորտը 4 տոկոս դարձավ: Փաշինյանը նշեց, որ դրա համար են ոլորտի եկամտահարկը դարձրել 36 տոկոս, որ փակվի և կրճատվի: