Կոչ եմ անում իրավապահ մարմիններին գրառումս ընդունել որպես հանցագործության մասին հաղորդում

Էջմիածնի քաղաքապետի պաշտոնակատար Դիանա Գասպարյանը ֆեյսբուքյան էջում գրել է․ «Ուշադրություն Ուրեմն նայում եմ Վարչապետի վերջին ուղիղ եթերը և տեսնում եմ այս մեկնաբանությունը (նկարը կցվում է ստորև): Դրան ուշադրություն չէի դարձնի, եթե վերջին շրջանում նկատած չլինեի նույն անձի և մի քանի այլ օգտատերերի (հիմնականում կեղծ) կողմից այս սուտ տեղեկատվության տարածումը տարատեսակ գրառումների և մեկնաբանությունների տեսքով: Քանի որ իմ գործելաոճում կարևորում եմ թափանցիկությունը և ազնվությունը համայնքիս բնակիչների հետ, ձեզ եմ ներկայացնում մի շարք ուշագրավ հանգամանքներ: Այս մարդու հետ ծանոթացել եմ ամռանը, երբ վերջինս եկել էր ինձ մոտ՝ հավանաբար ինչ-ինչ արտոնութուններ կամ աշխատանք ստանալու ակնկալիքով: Այն բանից հետո, երբ նրա սպասելիքները չարդարացան, վերջինս լծվեց ամեն գնով ինձ վատաբանելու, իմ մասին վիրավորական և զրպարտող տեղեկություններ տարածելու «սուրբ գործին»: Նույն իրավիճակն առկա է ոմն Կարինե Մարտիրոսյանի մոտ: Այս կինը քաղաքացիների ընդունելության օրը դիմել է ինձ, ներկայացել է որպես բարեգործությամբ զբաղվող ստուդիա (մարդկությանն անհայտ իրավաբանական անձի տեսակ) և խնդրել իրեն տարածք տրամադրել: Հարկ եմ համարում նշել, որ չեմ մերժել նրա խնդրանքը, պարզապես խնդրել եմ ներկայացնել իր կարգավիճակի և գործունեության վերաբերյալ փաստաթղթեր՝ տարածքի տրամադրման հարցը քննարկելու համար: Հավանաբար դժգոհ մնալով իմ պատասխանից՝ այս կինը ևս ջանք ու եռանդ չի խնայում բոլոր հնարավոր էջերով ինձ վատաբանող և զրպարտող գրառումներ տարածելու համար: Այսպես, եթե իմ էջի հետևորդների թվում կան մարդիկ, ովքեր ճանաչում են Անուշավան Ալեքսանյանին և Կարինե Մարտիրոսյանին, խնդրում եմ նրանց փոխանցել, որ փաստերի առկայության դեպքում կարող են դիմել իրավապահ մարմիններին: Միևնույն ժամանակ, հաշվի առնելով, որ ինտերնետային տիրույթում իրականացվող մոնիթորիգի շրջանակներում իմ այս գրառումը կարող է հայտնվել իրավապահ մարմինների ուշադրության կենտրոնում, կոչ եմ անում վերջիններիս այն ընդունել որպես հանցագործության մասին հաղորդում և ձեռնամուխ լինել հնչած մեղադրանքի հիմնավորվածությանը ստուգմանը: Քանի որ մեղադրանքը ոչ այլ ինչ է, քան լկտի սուտ, այն հնչեցնողներին և տարածողներին զգուշացնում եմ պատրաստ լինել դատարանում զրպարտության համար պատասխան տալուն: Ինչպես ասում են՝ անխնա տարածել»։