ՀՌԱՀ անդամը հակաքարոզչություն է անում

Հրապարակը գրում է. Տարբեր լրատվամիջոցներ ղեկավարած Տիգրան Հակոբյանը 2016 թվականի սեպտեմբերից Հեռուստատեսության եւ ռադիոյի ազգային հանձնաժողովի 8 անդամներից մեկն է։ Նա նաեւ ակտիվ հակաքարոզչություն է վարում իր ֆեյսբուքյան էջում՝ ոչնչացնելով իր հակակրանքի թիրախում հայտնված քաղաքական ուժին՝ «Սասնա ծռերին»։ Նոյեմբերի 28-ին ՀՌԱՀ անդամը «Ընտրական մանիպուլյացիա 1» վերտառությամբ հետեւյալ գրառումն է կատարել իր ֆեյսբուքյան էջում․ «Նախընտրական քարոզարշավում որպես արցախյան պատերազմի մասնակիցների ու շահերի կուսակցություն դիրքավորվող «Սասնա ծռերի» ընտրական ցուցակի առնվազն առաջին տասնյակում պատերազմի ոչ մի մասնակից չկա:

Կամ գոնե ապրիլյան պատերազմի: Քաղաքական բռնությունը, հարեւանների հետ անվերջ պատերազմների անհրաժեշտությունը հիմնավորող գաղափարախոսներ կան, ՊՊԾ գնդի վրա զինված հարձակման մասնակիցներ կան, ինքնաշեն պայթուցիկների պատրաստման մասնագետ կա, տարածաշրջանային համագործակցության (համագործակցության Կառլ!!!!) վերլուծական կենտրոնի ղեկավար կա, բայց պատերազմի մասնակիցներ չկան: Ստիպված՝ նախընտրական հոլովակներում անվերջ պտտում են Ժիրայրի արցախյան կադրերը, չնայած նա ցուցակում չկա։ Ռուսական անեկդոտի պես ա՝ "Муму" написал Тургенев, а памятник поставили Достоевскому... Ով Արցախը պաշտպանի, ում heros կոչեն...»։

Ինչ խոսք, հետաքրքիր դիտարկում է։ Տիգրան Հակոբյանը միշտ է հետաքրքիր, բայց այս դեպքում ՀՌԱՀ անդամն օրենքի հետ խնդիր ունի։ ՀՌԱՀ-ը զբաղվում է հեռուստառադիոընկերությունների կարգավիճակի, հիմնադրման, լիցենզավորման հարցերով, կանոնակարգում է արտոնագրի տրամադրման գործընթացը, ապահովում է հեռարձակվող լրատվության միջոցների անկախությունն ու բազմազանությունը եւ այլն։ Պետական մարմնի ներկայացուցիչը, օրենքի համաձայն, առհասարակ իրավունք չունի մասնակցել նախընտրական քարոզչությանը, առավել եւս նման գործընթացներում չպետք է ներգրավվի այն պետական պաշտոնյան, որն ի պաշտոնե առնչվում է ամենազանգվածային ԶԼՄ-ների գործունեության կանոնակարգմանը։ Տիգրան Հակոբյանին խնդրեցինք պատասխանել, թե արդյոք որպես ՀՌԱՀ աշխատող՝ նա իրավուք ունի՞ հակաքարոզչական նյութեր տեղադրել իր էջում։

«Իմ անձնական էջին, ինչպեսեւ յուրաքանչյուր քաղաքացի, իրավունք ունեմ արտահայտել իմ կարծիքները, ինչը մշտապես անում եմ, ու բացառապես աշխատանքային ժամերից դուրս»: Ցավոք, ՀՌԱՀ անդամի անձնական էջը հրապարակային է, նա բազմաթիվ հետեւորդներ ունի, որոնց թվում կան «ծռերի» համակիրներ։ Հենց նրանք էլ ահազանգեցին «Հրապարակին»։