Հենրիխ Մխիթարյան. Ֆուտբոլը կորցրեց լեգենդի

 «Իր հասարակ եւ գեղեցիկ խաղի շնորհիվ, Կրոյֆը ֆուտբոլը վերածեց արվեստի: Ֆուտբոլը կորցրեց լեգենդի: Հանգչիր խաղաղությամբ»,- Ֆեյսբուքում գրել է Մխիթարյանը: 27-ամյա ֆուտբոլիստը հիշատակել է Կրոյֆի հայտնի արտահայտությունը. «Ֆուտբոլ խաղալը շատ հեշտ է, բայց հասարակ ֆուտբոլ խաղալը ամենաբարդն է»: Ֆուտբոլային աշխարհը սգում է մարտի 24-ին Բարսելոնայում թոքերի քաղցկեղի հետեւանքով մահացած լեգենդար խաղացող եւ մարզիչ Յոհան Կրոյֆի վախճանը: Նա 68 տարեկան էր: «Միշտ կսիրենք քեզ, Յոհան: Հանգչիր խաղաղությամբ»,- ասվում է «Բարսելոնայի» պաշտոնական հաղորդագրությունում: «Սգում ենք մեծ կորստի կապակցությամբ եւ ցանկանում տոկունություն մաղթել Կրոյֆի ընտանիքին»,- նշվում է «Այաքսի» ցավակցականում: Հոլանդիայի թագավորական ֆուտբոլային միությունը ցավակցական հայտարարությունում գրում է՝ «խոսքերով հնարավոր չէ հաղորդել կորստի ամբողջ դառնությունը, որը մենք զգում ենք»:   Ֆուտբոլի Հայաստանի հավաքականի եւ Դորտմունդի «Բորուսիայի» կիսապաշտպան Հենրիխ Մխիթարյանը եւս ցավակցել է լեգենդար հոլանդացի ֆուտբոլիստ եւ մարզիչ Յոհան Կրոյֆի մահվան կապակցությամբ: Կրոյֆի ֆուտբոլային կարիերայի վերջին ակումբ «Ֆեյենորդը» նրան անվանել է «բոլոր ժամանակների մեծագույն հոլանդացի ֆուտբոլիստ»: Ցավակցություն են հայտնել նաեւ Լիոնել Մեսին, Մարադոնան, Բեկենբաուերը, Բեքհեմը, Նիկիտա Սիմոնյանը, գրեթե բոլոր հռչակավոր ֆուտբոլիստները: