Հայ շախմատիստների ելույթը՝ Ռեյկյավիկ օփենում

Իսլանդիայում ավարտվեց Ռեյկյավիկ Օփեն 2016 մրցաշարը, որին այս տարի մասնակցում էին 31 երկրի 235 շախմատիստ: Մրցաշարի մասնակիցների թվում էին 24 գրոսմայստեր և 24 միջազգային վարպետ: Հայաստանը այս ստուգատեսում ներկայացնում էին Հայաստանի տղամարդկանց հավաքականի անդամներ Գաբրիել Սարգսյանը, Սերգեյ Մովսիսյանը և Հրանտ Մելքումյանը: Մեր երեք շախմատիստներն էլ մրցաշարի հենց սկզբից պայքարում էին ամենաբարձր տեղերի համար, իսկ Սերգեյ Մովսիսյանը մրցաշարի միջնամասում միանձնյա գլխավորում էր աղյուսակը: Սակայն Ռեյկյավիկ օփենի 8-րդ տուրում Մովսիսյանը պարտվեց մրցաշարի ապագա հաղթող Գուպտային և գործնականում զրկվեց առաջին հորիզոնականը գրավելու հնարավորությունից: Արդյունքում Մովսիսյանը և Մելքումյանը 10 հնարավորից վաստակեցին 7,5-ական միավոր և կիսեցին 3-11-րդ տեղերը, իսկ լրացուցիչ ցուցանիշների հաշվարկից հետո Մովսիսյանը զբաղեցրեց 6-րդ, իսկ Մելքումյանը 9-րդ հորիզոնականը: Գաբրիել Սարգսյանը վաստակեց 7 միավոր: Իսկ մրցաշարի միանձնյա հաղթող դարձավ Աբիջեթ Գուպտան, ով 10 հնարավորից վաստակեց 8,5 միավոր: 2-րդ հորիզոնականը բաժին հասավ 8 միավոր վաստակած Դմիտրի Անդրեյկինին, իսկ Իվան Չեպարինովը եզրափակեց լավագույն եռյակը: