Մի նողկալի, մերժելի ավանդույթ էլ ձեւավորեց ՔՊ առաջնորդը

Մի նողկալի, մերժելի ավանդույթ էլ ձեւավորեց ՔՊ առաջնորդը. ստիպեց, որ իր թիմի բոլոր անդամները պարբերաբար իրեն հավատարմության ու զոհաբերության ծեսեր մատուցեն: Այսպես կոչված` «մուծվեն» բարեկեցիկ կյանքի, պաշտոնի, կարգավիճակի, եկամուտների համար: Նա պետական բյուջեից վճարվող աշխատավարձը համարում է, որ ինքն անձամբ է վճարում, որ մանդատն ու պաշտոններն ինքն է նվիրել, որ այդ բոլոր պաշտոնյաներն ու մանդատակիրները հիմա «սովից կսատկեին»` եթե ինքը չլիներ, ուստի բոլորը պարտավոր են իրեն ծառայել եւ աջակցել ամեն ինչում: Իր հրահանգով` կրակի մեջ նետվել, իր հակառակորդներին` իրենից ավելի կոշտ արձագանքել, իր բոլոր հակահայկական քայլերն արդարացնել ու իր ասած բոլոր հիմարությունները գովերգել-կրկնել-փառաբանել:
Այս զազրելի ավանդույթն է պատճառը, որ գյումրեցի աղջիկներից մեկն իր հոր տարիքի Միքայել Աջապահյանին է վիրավորում, մյուսը` ընտրված քաղաքապետին ու հարգված պրոդյուսերին: Եւ դատելով սրանց բառամթերքից` տեքստերը գրվել են կառավարության ղեկավարի կաբինետում, նրա ատելությանն ու ագրեսիային խիստ համահունչ:
Այս նողկալի վիճակն է պատճառը, որ անգամ մեր նախկին գործընկերներ Սիսակն ու Բաբկենը «չպլստացին»` նրանք էլ են պարբերաբար «վճարում»` իրենց կարգավիճակի դիմաց: Այս «ավանդույթն» է պատճառը, որ նախկին նախագահների ցանկացած հարցազրույցից հետո շարվեշարան ստատուսներ են գրվում` զանազան գրանտակերներից սկսած մինչեւ բարձրաստիճան պաշտոնյաներ:
Իսկ ամենանողկալին այն է, որ ՀԱԿ-ի հետ կապ ունեցած իր թիմակիցներին ստիպում է, որ Լեւոն Տեր Պետրոսյանի դեմ դուրս գան, ՀՀԿ-ի հետ առնչություն ունեցածներին` Սերժ Սարգսյանի ու ՀՀԿ-ի, Գյումրիից եկածներին` գյումրվա գործիչների, կաթողիկոսի հետ նորմալ հարաբերություններ ունեցածներին` Վեհափառի եւ այդպես շարունակ: Բոլորին փչացնում է, որպես մուրճ կամ քլունգ օգտագործում...

Այս մասին գրել է Հրապարակ օրաթերթի գլխավոր խմբագիր Արմինե Օհանյանը։