Քննիչը չարաշահել է պաշտոնեական լիազորությունները

Jun 06, 2016 Comments Off on Քննիչը չարաշահել է պաշտոնեական լիազորությունները

ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում ծանր հանցագործության դեպքի առթիվ քննվող քրեական գործի ուսումնասիրությամբ պարզվել է, որ հիշյալ քրեական գործը քննող քննիչը, անձնական այլ շահագրգռվածությունից ելնելով, բավարար հիմքերի և առիթների առկայության պայմաններում չի կատարել ծառայողական պարտականությունները, փոխարենը, պաշտոնեական դիրքն օգտագործել է ծառայության շահերին հակառակ: Մասնավորապես՝ քննիչն առանց բավարար հիմքերի առկայության՝ նույն քրեական գործով ձերբակալել է Ռ. Թ.-ին և Վ. Վ.-ին և նրանց նկատմամբ կալանավորումը որպես խափանման միջոց կիրառելու միջնորդություն է ներկայացրել դատարան: Բացի այդ, քննիչի դիտավորյալ գործողությունների արդյունքում տեղի է ունեցել նախաքննական տվյալների և կայացվելիք հարկադրանքի միջոցների վերաբերյալ տեղեկատվության արտահոսք, ինչը հնարավորություն է տվել Գ. Գ.-ին, Ա. Ն.-ին և Գ. Ա.-ին թաքնվել քննությունից: Պետական հատուկ ծառայություն իրականացնող պաշտոնատար անձի կողմից պաշտոնեական լիազորությունները չարաշահելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 308-րդ հոդվածի 1-ին մասի հատկանիշներով հարուցվել է քրեական գործ: Կատարվում է նախաքննություն:

Լուրեր
Մեկնաբանությունները փակ են: