Նիկոլի նույն սովետիզմն ու դեսպոտիզմը` ժողովրդավարության շղարշի տակ

Jun 13, 2018 Չի մեկնաբանվել

Կառավարության նիստի ժամանակ պարտադիր կուտակային կենսաթոշակային համակարգի շուրջ առաջացած բանավեճը, երբ վարչապետ Նիկոլ Փաշինյանը բառիս ամենաուղիղ իմաստով կոպտեց Արծվիկ Մինասյանին, Նիկոլ Փաշինյանի առաջին լուրջ սայթաքումն էր:

Կարելի է ասել, որ Արծվիկ Մինասյանին հաջողվեց ինչ-որ առումով հունից հանել ժողովրդավար վարչապետին և հենց ուղիղ եթերում ցույց տալ հանրությանը, որ ժողովրդի կողմից ընտրված վարչապետը, մեղմ ասած, անհանդուրժող է այլակարծության նկատմամբ:

Միջադեպը լայն արձագանք է գտել սոցիալական հարթակներում. շատերը համոզված են, որ տեղի ունեցած միջադեպից հետո գործադիրում որևէ այլ կարծիք այլևս չի հնչի: Տարբերվող մոտեցում ունեցող նախարարները կաշկանդված են լինելու արտահայտել իրենց տեսակետները: Տնտեսական զարգացման և ներդրումների նախարար Արծվիկ Մինասյանի և Նիկոլ Փաշինյանի միջև բուռն բանավեճի առիթը, հիշեցնենք, պարտադիր կուտակային կենսաթոշակների վերաբերյալ նոր նախագծի քննարկումն էր: Արծվիկ Մինասյանը նախագծի այդ տեսքով ընդունման հետ կապված վերապահումներ ուներ և գտնում էր, որ կարելի է հետաձգել նախագիծը, և քննարկումների ընթացքում գուցե ավելի լավ լուծում գտնվի:

Մինասյանը նաև հայտարարեց, որ իբրև Դաշնակցության ներկայացուցիչ՝ երբեք չի եղել, որ ինքը կողմ քվեարկի պարտադիրի բաղադրիչին և այս անգամ էլ մնում է իր կարծիքին ու դեմ է: Նիկոլ Փաշինյանը հարցրեց՝ ո՞րն է Մինասյանի տեսակետը. «Դեմ եմ այն մոդելին, որ կա, բայց հասկանալով հանդերձ, որ այսօրվա լուծումը պարտադրված լուծում է»: Այս բացատրությունը կարծես թե չբավարարեց վարչապետին, ով նույնպես ժամանակին Ազգային Ժողովում դեմ էր քվեարկել պարտադիր կուտակայինի մասին նախագծին: Փաշինյանը հայտարարեց, որ ինքը թույլ չի տա, որ իր ղեկավարած կառավարությունում որևէ մեկը փորձի ավել կամ պակաս սկզբունքային երևալ. «Պարո՛ն Մինասյան, մենք պետք է հասկանանք, որ գործում ենք թիմային պատասխանատվության շրջանակներում. մենք հիմի կառավարության նիստում ենք, մենք խորհրդարանական ընդդիմություն չենք, այդ հարցերը, որոնք Դուք բարձրացնում եք, մեր լիազորությունների, լծակների տիրույթում է: Եթե Դուք ասում եք, որ ունեք հարցեր, որոնց պատասխանները դեռ չգիտեք, այդ հարցերի պատասխանները տալը նաև Ձեր աշխատանքային պարտականությունն է, նաև մեր՝ բոլորիս աշխատանքային պարտականությունն է: Եկեք  շատ հստակ հասկանանք, մենք կա՛մ այս թիմային պատասխանատվությունը վերցնում ենք, կա՛մ չենք վերցնում: Հիմա ովքեր այս պատասխանատվությունը վերցնում են, մեզ հետ են, ովքեր չեն վերցնում, մեզ հետ չեն: Ես ուզում եմ, որ սա հստակ արձանագրենք»,- հայտարարեց Նիկոլ Փաշինյանը, որից հետո Արծվիկ Մինասյանը, ինչպես և կառավարության մնացած անդամները կողմ քվեարկեցին նախագծին:

Խնդիրն այստեղ այն չէ, որքանով էր իրավացի վարչապետը, որքանով՝ նախարարը: Վստահաբար կան բազմաթիվ փաստարկներ` հօգուտ Փաշինյանի մոտեցման, կան նաև նույնքան փաստարկներ` հօգուտ Արծվիկ Մինասյանի տեսակետի: Բայց ամենակարևորն այստեղ երևույթն է, որը տառացիորեն հիշեցնում է Սերժ Սարգսյանի կառավարման նախահեղափոխական ժամանակները:

Փոքրիկ մեջբերում 2013 թվականի նախագահական ընտրություններից հետո Սերժ Սարգսյանի ասուլիսից. «Ինձ համար անհասկանալի են ոմանց այն մոտեցումները, որ լինելով իշխանության մեջ` ընդդիմություն են խաղում: Իշխանության մեջ գտնվողները չեն կարող անել հայտարարություններ, որոնք հակասում են իշխանությունների քաղաքական գծին: Իշխանության մեջ գտնվողը չի կարող ասել, որ մենք պետք է ճանաչենք ԼՂՀ անկախությունը: Ես 10 րոպե հետո նրան աշխատանքից կազատեմ: Իշխանության մեջ գտնվողը չի կարող տարածքային պահանջներ ներկայացնել որևէ հարևան երկրի: 10 րոպե հետո ես նրան աշխատանքից կազատեմ: Ընդհանրապես իշխանության մեջ գտնվողը իրավունք չունի որևէ քաղաքական գծի նկատմամբ վերադասի հայտարարություններ անել: Բոլոր այն մարդիկ, ովքեր գտնվում են իշխանության մեջ և ցանկանում են քննադատել իրենց վերադասներին, պարտավոր են դիմում գրել, ներկայացնել հրաժարական, այնուհետև գնալ, քշտել թևքերը եւ անխնա քննադատել բոլորին: Սա իրենց իրավունքն է»:

Հիմա առաջանում է հարց` ի՞նչ տարբերություն Հայաստանի նախկին և ներկա ղեկավարների կառավարման ոճերի ու ժողովրդավարական մոտեցումների միջև: Խոստովանենք` շատ նման են իրար: Բա այդ դեպքում ո՞րն էր հեղափոխության իմաստը, և ո՞ւր մնացին սերն ու համերաշխությունը: Փաստորեն, նույն սովետիզմն ու դեսպոտիզմն է՝ ժողովրդավարության քողի ներքո:

 

Հայկ Դավթյան

Գլխավոր Թողարկում, Վերլուծություն
Անդրադարձներ չկան to “Նիկոլի նույն սովետիզմն ու դեսպոտիզմը` ժողովրդավարության շղարշի տակ”

Մեկնաբանել