«Աբովյանում այնպիսի կիրթ հանդիսական կա, որ Երևանում հաճախ կերազես նման հանդիսականի մասին». Հակոբ Ղազանչյան (video)

Dec 27, 2017 Comments Off on «Աբովյանում այնպիսի կիրթ հանդիսական կա, որ Երևանում հաճախ կերազես նման հանդիսականի մասին». Հակոբ Ղազանչյան (video)


Հայաստանի թատերական գործիչների միության նախագահ Հակոբ Ղազանչյանն, ամփոփելով 2017 թվականն ասաց, որ տարին լի է եղել նշանակալի թատերական իրադարձություններով. փառատոներ, հյուրախաղեր և այցելություններ մարզային թատրոններ:
«Տարվա գլխավոր թատերական իրադարձությունը ՀԹԳՄ «Արտավազդ» ամենամյա թատերական մրցանակաբաշխությունն էր, որն ավանդաբար անց է կացվում մարտի 27-ին` Թատրոնի միջազգային օրը: Այդ օրը մենք իմի ենք բերում նախորդ տարվա կատարված աշխատանքները»,- նշեցՀ. Ղազանչյանը՝ հավելելով, որ «Արտավազդ» ամենամյա մրցանակաբաշխությունն այս տարի նվիրված էր հայ անվանի դերասան Էդգար Էլբակյանի 90-ամյակին:
Հայաստանի թատերական գործիչների միությունը շարունակում է ուշադրությունը պահել մարզային թատրոնների խնդիրների վրա: «Ուրախալի է, որ Գավառի նախկին մարզպետ, ներկայումս ՀՀ ԱԺ պատգամավոր Ռաֆիկ Գրիգորյանի սկզբունքային հետևողականության շնորհիվ, ավարտին է հասցվում Գավառի թատրոնի նոր շենքը»,- ասաց Հ. Ղազանչյանը:
ՀԹԳՄ նախագահն առանձնացրեց ՀՀ մշակույթի նախարարության և «Հրայր և Աննա Հովնանյան» բարեգործական հիմնադրամի հովանավորությամբ, ՀՀ Սյունիքի մարզպետարանի աջակցությամբ ս.թ. մայիսի 19-27-ը կայացած «Թատերական Սյունիք» փառատոնը: «Փառատոնի գլխավոր նպատակն էր հանրապետության լավագույն թատրոնների ներկայացումների կազմակերպումը ՀՀ Սյունիքի մարզի Սիսիան, Գորիս, Կապան, Քաջարան, Ագարակ և Մեղրի քաղաքներում: Նշված տարածաշրջանում միաժամանակ 10-ը թատերախմբերի ելույթները միջոցառումը վերածեցին իսկական թատերական տոնի ոչ միայն այն պատճառով, որ հեռավոր քաղաքների բնակչությունը չունի հնարավորություն առնչվելու մայրաքաղաքային թատերական կյանքին և մոտիկից ծանոթանալու անվանի թատերական գործիչներին, այլև տեղում վեր հանելով տարածաշրջանում գործող երկու` Գորիսի Վ. Վաղարշյանի անվան և Կապանի Ալ. Շիրվանզադեի անվան թատրոնների առկա խնդիրները՝ ավելի արդյունավետ դարձրին այդ թատրոնների աշխատանքը»:
Խոսելով փառատոների մասին՝ Հ. Ղազանչյանը ներկայացրեց նաև Հայաստանի թատերական գործիչների միության և Աբովյանի համայնքապետարանի ս.թ. հոկտեմբերի 6-12-ը Աբովյանում կայացած Աբովյանի ամենամյա փառատոնը, որի շրջանակում ցուցադրվեց շուրջ 10 ներկայացում` Երևանի, Աբովյանի և Վանաձորի թատրոնների մասնակցությամբ: Ի լրումն Աբովյան քաղաքի թատրոնի գործունեության, կարևոր հանգամանք է Աբովյանի թատրոնի նոր ղեկավարի նշանակումը: Միության երաշխավորությամբ քաղաքի թատրոնի ղեկավարությունը քաղաքապետ Վահագն Գևորգյանը վստահեց «Էպսիդոն» թատերախմբի ղեկավար Արմեն Սարգսյանին, որը կարճ ժամանակահատվածում հսկայական աշխատանք տարավ հանդիսատեսին ներգրավելու գործում:
ՀԹԳՄ նախագահը նշեց նաև, որ միության նախաձեռնությամբ, այս տարի «ԿԱՌԼԼԵՎՈՆԻ» պատկերասրահում կայացել է մեր հայրենակից, ռոստովաբնակ քանդակագործ և նկարիչ Ներսես Կիրակոսյանի ցուցահանդեսի բացումը: Ներկայացված էին հայ թատրոնի երախտավորների շուրջ 30 գրաֆիկական աշխատանքներ, որոնք նկարիչը անհատույց նվիրեց Հայաստանի թատերական գործիչների միությանը:
Ամփոփելով զրույցը՝ Հ. Ղազանչյանն ասաց, որ միությունը 2017թ. լուրջ նախապատրաստական աշխատանքներ տարավ ԱՊՀ-ի, Բալթյան երկրների և Վրաստանի երիտասարդական թատերական հերթական ֆորումը 2018թ. մայիսին Հայաստանում անցկացնելու ուղղությամբ: Միության նախաձեռնությամբ, նշված պայմանավորվածությունը ձեռք բերվեց Երևանում՝ Հայաստանի մշակույթի նախարար Արմեն Ամիրյանի և Թատերական միությունների միջազգային համադաշնության նախագահ, Չեխովի անվան թատերական միջազգային փառատոնի գլխավոր պրոդյուսեր Վալերի Շադրինի հանդիպման ժամանակ։ Սա աննախադեպ թատերական տոնախմբություն է լինելու, որին նշված երկրներից մասնակցելու են մոտ 300 մարդ՝ երիտասարդ բեմադրիչներ, դերասաններ, թատերագետներ, դրամատուրգներ, սցենոգրաֆներ: Կցուցադրվեն ներկայացումներ, կկազմակերպվեն ցուցահանդեսներ, սեմինարներ, քննարկումներ, վարպետության դասեր և այլն:
Նման առաջին ֆորումը 2012թ. տեղի ունեցավ Քիշնևում, երկրորդը՝ 2015թ., Մինսկում։

Գլխավոր Թողարկում
Մեկնաբանությունները փակ են: