Արցախցիների համար 40+10 ծրագրի ժամկետը երկարաձվեց մինչեւ տարեվերջ

Կառավարություն իր այսօրվա՝ մարտի 28-ի նիստում որոշեց ԼՂ-ից բռնի տեղահանված անձանց 40+10 հազար աջակցության ծրագրի հիման վրա եւս 9 ամիս շարունակել աջակցության տրամադրումը, այսինքն շահառուների կեցության եւ այլ ծախսերը հոգալու համար տրամադրել աջակցություն 2024-ի ապրիլից մինչեւ դեկտեմբերը ներառյալ:

Աշխատանքի և սոցիալական հարցերի նախարար` Նարեկ Մկրտչյանը ներյկայացնելով նախագիծը՝ նշեց, որ աջակցությունը կհատկացվի ընտանիքի բոլոր անդամներին, այդ թվում անչափահասներին:

«Այս նոր նախագծով ընդլայնում ենք շահառուների շրջանակը, մասնավորապես, որպես շահառու ենք դիտարկում արդեն 2020-ից հետո տեղահանված ընտանիքների անդամներին, նրանց թիվը շուրջ 6 հազար է: Նաեւ շահառու կդառնան բռնի տեղահանված ընտանիքներում նոր ծնված եւ ծնվող երեխաները:

Այս ծրագրով շահառու չեն հանդիսանա ՀՀ-ում բնակարանային ծրագրի շահառուները, սա վերաբերում է բնակարանային հավաստագրի իրավունք ունեցող ԼՂ առանձին շրջաններից տեղահանված ընտանիքներին:

Նույն ծրագրի շրջանակներում ժամկետների փոփոխություն ենք իրականացնում 50 եւ 100 հազարի ծրագրերում՝ հնարավորություն տալով շուրջ 350 հոգու դառնալ այդ ծրագրերի եւ մյուս ծրագրերի շահառու, եթե նրանց տեղահանված ճանաչելու ուղղությամբ ընթացիկ քննվող դիմումների հիման վրա մենք միգրացիոն ծառայությունից կստանանք հաստատում տեղահանված լինելու փաստի մասով»,-ասաց նախարարը:

Նա հավելեց, որ դիմումներն ընդունվելու են ապրիլի 15-ից, իսկ 40+10 ծրագրի համակարգում դիմում ունեցող չափահասները կրկին դիմելու կարիք չեն ունենալու:

«Տարեվերջին ծրագրի տվյալ պահի դրությունը կուսումնասիրենք եւ կդիտարկենք ծրագրի շարունակման նպատակահարմարությունը»,- ընդգծեց Նարեկ Մկրտչյանը: